Bıyl elimizde shomylý maýsymynda 300-den astam adam sýǵa ketti

NUR-SULTAN. QazAqparat – Elimizde jazǵy shomylý maýsymy qorytyndylandy. Ókinishke qaraı, bıylǵy shomylý maýsymynda 319 qazaqstandyqtyń ajaly sýdan keldi. Bul týraly QR Tótenshe jaǵdaılar mınıstrligi azamattyq qorǵanys jáne áskerı bólimder komıtetiniń basqarma basshysy Qanat Turysbaev málim etti, dep habarlaıdy QazAqparat tilshisi.

«Bıylǵy shomylý maýsymynda TJM qutqarýshylary 328 adamdy, onyń ishinde 61 balany qutqardy. Sondaı-aq, adamdardyń sýdaǵy qaýipsizdigin qamtamasyz etý maqsatynda TJM ortalyq jáne jergilikti atqarýshy organdarmen ózara is-qımyl jasaı otyryp, is-sharalar keshenin ótkizdi. Bıyl elimiz boıynsha shomylýǵa ruqsat etilgen 538 oryn belgilendi, bul ótken jylmen salystyrǵanda 93 orynǵa kóp. Odan bólek, jergilikti atqarýshy organdarmen jáne jeke menshik nysandarmen birlesip 454 qutqarý jáne 66 medıtsınalyq beket quryldy. Jáne asa qaýipti ýchaskelerde 59 mobıldi qutqarý beketi qoıyldy», - dedi Qanat Turysbaev OKQ-de ótken baspasóz máslıhatynda.

Onyń aıtýynsha, sýda shomylý qaýipsizdigi erejesi men talapqa qaramastan ólim jaǵdaıy tirkelip otyr.

«Sý aıdyndarynda 6 655 qaýipsizdik belgisi jáne 1 656 aqparat taqta ornatyldy, onda adamdardyń qaza bolý sebepteri men oqıǵalarǵa yqpal etken jaǵdaılar jazylǵan. Bizdiń mınıstrlik pen memlekettik organdar qabyldap jatqan sharalarǵa qaramastan, shomylý maýsymy kezeńinde sý aıdyndarynda qarapaıym qaýipsizdik erejelerin saqtamaǵan 319 adam sýǵa ketip kóz jumdy. Onyń 95-i kámelet jasyna tolmaǵan», - deıdi ol.