Bıyl elimizde shegirtke 554 myń gektarǵa taralýy múmkin

NUR-SULTAN. QazAqparat – Bıyl úıirli shegirtke 554 myń gektarǵa taralýy múmkin. Bul týraly QR AShM Agroónerkásiptik keshendegi memlekettik ınspektsııa komıtetiniń tóraǵasy Almabek Mars málim etti, dep habarlaıdy QazAqparat tilshisi.

«Respýblıkalyq fıtosanıtarlyq dıagnostıka jáne boljamdar ádistemelik ortalyǵy» RMM málimetterine sáıkes, 2020 jyly 554 myń gektar alańda úıirli shegirtke zııankesteri, onyń ishinde ıtalıandyq prýs – 295,9 myń gektar, azııalyq shegirtke – 164,2 myń gektar jáne marokkalyq shegirtke 93,9 myń gektar alańda taralýy múmkin. Budan basqa, saıaq shegirtke zııankesteriniń taralýy 266,8 myń ga alańda boljanyp otyr», - dedi komıtet tóraǵasy Ortalyq kommýnıkatsııalar qyzmetinde.

Onyń sózine qaraǵanda, úıirli shegirtke zııankesterimen kúresý úshin respýblıkalyq bıýdjetten 1 mlrd teńge bólindi. Atalǵan qarajat pestıtsıdter men hımııalyq óńdeý boıynsha qyzmetterdi joǵaryda atalǵan alańǵa satyp alýǵa múmkindik berdi.

«Saıaq shegirtkege qarsy kúres júrgizý úshin jergilikti bıýdjet qarajatynan 555,1 mln teńge bólindi. Sonymen qatar, ortalyq qoımada shegirtke zııankesterimen kúresý úshin jalpy aýdany 525,3 myń gektar alańǵa eseptelgen 47,5 myń lıtr kóleminde pestıtsıd qory bar», - dedi Almabek Mars.

Úıirli shegirtkege qarsy tıimdi óńdeý júrgizý úshin pestıtsıdterdiń ártúrli toptarynyń preparattary satyp alyndy. Óńdeýge 148 arnaıy búrikkish tehnıka tartyldy.