Bıyl elimizde kohlearly ımplantat otasy jasalǵan 100-den astam bala estý, sóıleý boıynsha ońaltýdan ótti
«Atalǵan shara estý qabyldaýy (dybystyq sıgnaldardy qabyldaý) men aýyzsha sóıleýdi damytýda qajetti kezeń bolyp tabylady. Bul sharasyz ota tıimsiz bolyp sanalady. Ońaltýdyń basty maqsaty - balany qorshaǵan ortadaǵy dybystardy qabyldaýǵa, ajyratýǵa, onyń maǵynasyn túsinýge úıretý jáne tájirıbeni sóıleý mashyǵyn damytýda qoldaný», - deıdi mamandar. Balalarmen sabaqty túrli sala mamandary: sýrdopedagogtar, logopedter, dybys protezısteri, aýdıologtar jáne taǵy basqalary júrgizedi. Sonymen qatar estý, sóıleý ońaltý sharalaryn sapaly ótkizý jáne tájirıbe almasý maqsatynda qosymsha Ýkraına men Reseıden mamandar shaqyrylǵan. Bul sharalar kohlearly ımplantaty bar balalardyń ata-analaryna úı jaǵdaıynda úzdiksiz, júıeli túrde sabaqtardy júrgizýde qajetti tájirıbe alýǵa kómektesti. Atap aıtqanda, estý, sóıleý ońaltý sharalary boıynsha ótkiziletin kýrstar kohlearly ımplantaty bar múgedek balalardy áleýmettik qoldaýdy ári qaraı damytýǵa, jedel em sharalarynyń tıimdiligin arttyrýǵa, atalǵan sanattaǵy balalar ómiriniń sapasyn jaqsartýǵa, nátıjesinde olardyń qoǵamdyq ortaǵa sátti beıimdelýine septigin tıgizedi. Esterińizge sala keteıik, kohlearly ımplantat - kereń patsıentterdiń estý qabiletin qalpyna keltirýge kómektesetin protez. Qazirgi tańda Qazaqstanda 3 myńǵa jýyq bala qulaq aýrýy saldarynan múgedektik sanatynda. QR DSÁDM bastamasymen 2014 jyldan bastap respýblıkada kohlearly ımplantaty bar balalardyń estý, sóıleý ońaltýyn ótkizý boıynsha is-sharalar júzege asyrylyp keledi.