Bıyl elimizde qansha baspana tapsyrylady
NUR-SULTAN. QazAqparat – Bıyl jarty jylda turǵyn úı qurylysyna 600 mlrd teńgeden astam qarjy tartyldy. Bul týraly Úkimet otyrysynda Indýstrııa jáne ınfraqurylymdyq damý mınıstri Roman Sklıar málim etti, dep habarlaıdy QazAqparat tilshisi.
«Osy jyly 6 aı ishinde turǵyn úı qurylysyna 605,7 mlrd teńge ınvestıtsııa tartyldy. Bul 2018 jylǵy deńgeıden 15,5 paıyzǵa joǵary. 1 teńge memlekettik qarajatqa 7,4 teńge jeke ınvestıtsııa tartyldy. Bıyldyń sońyna deıin 118 myń baspana (13 mln sharshy metr) salýdy josparladyq. Jartyjyldyq qorytyndy boıynsha 48 925 baspana (5,7 mln sharshy metr) paıdalanýǵa berildi», - dedi mınıstr.
Onyń sózine qaraǵanda, 2018 jylmen salystyrǵanda turǵyn úıdi paıdalanýǵa berý boıynsha Túrkistan (147,4%), Qyzylorda (122,4%), Almaty (115,6%) jáne Qostanaı (115,2%) oblystary kósh bastap tur. Alaıda Nur-Sultan qalasynda jáne Mańǵystaý oblysynda qurylys qarqyny sáıkesinshe 32,8 paıyzǵa jáne 10,3 paıyzǵa tómendegen. Bul jalpy respýblıkalyq kórsetkishke teris áser etti, ıaǵnı turǵyn úı qurylysy 1,9 paıyzǵa tómendedi.
«Sondyqtan, bul óńirler jeke qurylys salýshylar arqyly jumysty jandandyrýy kerek. Tutas alǵanda, basqa óńirlerdegi qurylys qarqynyn arttyrý arqyly jyldyq josparǵa qol jetkizetin bolamyz», - dedi Roman Sklıar.
