Bıyl elimizde qandaı respýblıkalyq joldar jóndeledi
ASTANA. QazAqparat - Osy jyly elimizdegi avtomobıl joldarynyń qurylys jáne jańǵyrtý jumystarymen qamtylýy 10,5 myń shaqyrymǵa deıin jetedi. Bul týraly vedomstvonyń keńeıtilgen alqa otyrysynda QR Indýstrııa jáne ınfraqurylymdyq damý vıtse-mınıstri Almaz Ydyrysov aıtty.
Onyń aıtýynsha, bıyl respýblıkalyq joldardyń jelisi boıynsha 7,3 myń shaqyrymǵa, sondaı-aq jergilikti jelide 3,2 myń shaqyrym joldy salyp, jańǵyrtý josparlanyp otyr.
Aıta ketý kerek, qazir elimizdiń shyǵys óńirinde «Taldyqorǵan – Óskemen», «Qalbataý-Maıqapshaǵaı», «Úsharal – Dostyq» syndy iri avtojol jobalary júzege asyrylyp keledi. Bıyl 180 shaqyrymǵa jetetin «Úsharal – Dostyq» ýchaskesinde tıisti jumystardy tolyq aıaqtaý kózdelgen. Qalǵan ýchaskeler boıynsha jańa jabyn arqyly jol qozǵalysyn ashý 2024 jylǵa mejelenip otyr.
Vıtse-mınıstr «Qyzylorda – Jezqazǵan» ýchaskesindegi qurylys týraly aıta kele, bıyl Ulytaý oblysyndaǵy jol ýchaskesinde tıisti jumystar bastalatynyn atap ótti. Sondaı-aq «Jezqazǵan – Qaraǵandy» jobasy boıynsha da qurylys jumystary bastalatyny belgili boldy.
Memleket basshysynyń tapsyrmasyna sáıkes byltyrǵy jeltoqsan aıynda mınıstrlik Qazaqstan Respýblıkasynyń kólik-logıstıkalyq áleýetin damytýdyń 2030 jylǵa deıingi tujyrymdamasyn bekitkenin aıta ketken jón. Bul salany odan ári damytyp, aldaǵy is-qımyldy aıqyndaıtyn negizgi qujat sanalady. Elimizdiń tranzıttik áleýetin arttyrý úshin byltyr temirjol salasyndaǵy iri ınfraqurylymdyq jobalar júzege asyryla bastaǵanyn aıta keteıik. Atap aıtqanda, 2022 jyldyń qarasha aıynda temirjol kóligi salasyndaǵy iri jobalardyń biri – «Dostyq-Moıynty» temirjol ýchaskesiniń ekinshi torabynyń qurylysy bastalǵan bolatyn.
