Bıyl elimizde egistik alqaby 68,6 myń gektarǵa ulǵaıady
«Oblys ákimdikteriniń derekterine sáıkes, bıylǵy egis alqaptarynyń qurylymy qalyptastyryldy. Jalpy egistik alqaby 23,4 mln gektar bolady, bul – ótken jylmen salystyrǵanda 68,6 myń gektarǵa kóp. Atap aıtqanda, dándi jáne dándi-burshaqty egis alańyn 117 myń gektarǵa, azyq daqyldary alańyn 36,5 myń gektarǵa jáne qant qyzylshasy boıynsha egistik kólemin 6,7 myń gektarǵa ulǵaıtý kózdelip otyr. Naryq suranysynyń ózgerýine baılanysty maqsary, soıa jáne qysha sııaqty keıbir maıly daqyldar egýdi shamaly qysqartý josparlandy», - dedi Erbol Qarashókeev Úkimet otyrysynda baıandama jasaı otyryp.
Mınıstrdiń aıtýynsha, bıyl kúnbaǵys sekildi áleýmettik mańyzy bar daqyldar alqaby 30,8 myń gektarǵa ulǵaımaq.
«Sonymen qatar, kókónister egýdi 11,1 myń gektarǵa ulǵaıtý josparlanyp otyr. Jıi sýarýdy qajet etetin daqyldarǵa kelsek, bıyl ótken jylmen salystyrǵanda maqta alańy 14,8 myń gektarǵa azaıýy múmkin – 111,4 myń gektar. Úkimettiń sýdy kóp qajet etetin daqyldar alańyn azaıtý jónindegi tapsyrmasyna qaramastan, kúrish egý alańy ótken jylmen salystyrǵanda 7,6 myń gektarǵa ulǵaıýy baıqalady», - deıdi ol.
Sondaı-aq, E. Qarashókeev josparlanǵan egistik alańdary ishki naryq qajettiligin tolyq qamtýǵa múmkindik beretinin aıtty.