Bıyl elimizde dándi daqyldar 22,5 mln gektarǵa egildi
«2020 jyly aýyl sharýashylyǵy daqyldaryn 22,5 mln gektar alańǵa egý josparlanýda, bul 2019 jylǵy deńgeıden 238 myń gektarǵa kóp. Bul rette ımporttyń ornyn basý úshin joǵary rentabeldi daqyldar paıdasyna egis alańdarynyń qurylymyn ártaraptandyrý máselesine erekshe nazar aýdarylady. Osylaısha, bıyl maıly daqyldardyń alańy 122,2 myń gektarǵa, kókónis daqyldarynyń - 10 myń gektarǵa, baqsha daqyldary - 1,5 myń gektarǵa, kartop - 7,8 myń gektarǵa, azyqtyq daqyldar - 308,6 myń gektarǵa, qant qyzylshasynyń alańy 2,4 myń gektarǵa ulǵaıady», - dedi S. Omarov.
Onyń sózine qaraǵanda, dándi daqyldar alańy 14,9 mln gektardy quraıdy, bul ótken jylmen salystyrǵanda 191,6 myń gektarǵa kem.
«Qazirgi ýaqytta aýyl sharýashylyǵy daqyldaryn egý respýblıkanyń barlyq aımaqtarynda júrgizilýde. Atap aıtqanda, dándi jáne dándi–burshaqty daqyldar 9,6 mln gektarǵa nemese josparlanǵan alańnyń 65 paıyzyna, maıly daqyldar 2,3 mln gektarǵa (76%), kókónis-baqsha daqyldary men kartop – 400 myń gektarǵa (85%), qant qyzylshasy
20,5 myń gektarǵa (93%), maqta 118 myń gektarǵa (100%), kópjyldyq shópter 352 myń gektarǵa (100%) egildi. Bul rette, ońtústik óńirdegi oblystarda, sondaı-aq Aqtóbe, Atyraý oblystarynda egis jumystary aıaqtalýǵa jaqyn», - dedi mınıstr.
Qazgıdromettiń boljamyna sáıkes, mamyrdyń úshinshi onkúndigi jańbyrly bolady dep kútilýde. Ásirese, bul Qostanaı, Batys Qazaqstan, Aqmola, Soltústik Qazaqstan, Shyǵys Qazaqstan jáne Pavlodar oblystaryna qatysty.
«Osyǵan baılanysty sebýdi ońtaıly merzimde aıaqtaý úshin árbir jaımashýaq kúndi barynsha jemisti paıdalaný, turyp qalýdy boldyrmaý jáne múmkin bolǵan jaǵdaıda, agregattardyń eki aýysymdyq jumysyn uıymdastyrý arqyly ónimdilikti arttyrý sharalaryn qabyldaý qajet», - dedi S. Omarov.