Bıyl elimizde alaıaqtyqtyń 30 myńnan astam faktisi anyqtaldy - QR ІІM
ASTANA. QazAqparat - Bıylǵy jyldyń 10 aıynda alaıaqtyqtyń 30445 faktisi tirkeldi. Bul týraly búgin QR Іshki ister mınıstrliginde ótken brıfıngte aıtyldy.
Belgili bolǵandaı, olardyń kóbi Astana, Almaty qalalarynda, Ońtústik Qazaqstan, Shyǵys Qazaqstan, Almaty jáne Qaraǵandy oblystarynda jasalǵan. Alaıaqtyq áreketterdiń negizgi bóligi (85,6% nemese 26073) shaǵyn jáne aýyrlyǵy ortasha qylmystar sanatyna jatady. Aýyr qylmystar sanatyndaǵy alaıaqtyq faktisi 14,4 paıyzdy (4372) qurady.
QR ІІM Krımınaldyq polıtsııa departamentiniń bólim basshysynyń sózine qaraǵanda, alaıaqtyq jolmen múlikti urlaý taýarlar men qyzmetterdi tutyný naryǵynda den alyp otyr, munda jeke adamdarǵa da, zańdy tulǵalarǵa da eleýli materıaldyq jáne moraldyq shyǵyn keltirilgen. Alaıaqtardyń negizgi maqsaty bóten múlikke quqyqtardy alýǵa baǵyttalǵan (aqshalaı qarajat, páterler, garajdar, saıajaılar, avtomashınalar jáne t.b.).
Máselen, alaıaqtar, kóbinese halyqtyń senimin paıdalanyp, gazetter men basqa BAQ quraldaryndaǵy habarlandyrýlar boıynsha tutynýshylyq nesıeler alyp berýdi usynady.
Aıta keteıik, aǵymdaǵy jyly Aqtóbe oblysynda Astana qalasynyń turǵyny ustaldy. Bul áıel aldaý arqyly sot tyıym salǵan páterlerdi satamyn dep azamattardyń jalpy somasy 46 mln. 525 myń teńge aqshasyn ıemdenip ketken. Qazirgi kezde ol jazasyn ótep jatyr.
