Bıyl elimizde 6 álemdik ýnıversıtettiń fılıaly ashylady

ASTANA. QazAqparat – Bıyl elimizde taǵy birneshe álemdik ýnıversıtettiń fılıaly ashylady. Osylaısha aldaǵy 3-5 jyldyń ishinde otandyq joǵary bilim berý salasy aıtarlyqtaı ózgeriske ushyraıdy. Bul týraly ǵylym jáne joǵary bilim mınıstri Saıasat Nurbek málim etti, dep habarlaıdy QazAqparat tilshisi.

«Memleket basshysynyń tapsyrmasyna sáıkes elimizde álemdik deńgeıdegi ýnıversıtettterdiń fılıaly ashylyp jatyr. Bul baǵyttaǵy jumys jalǵasyn tabady. Byltyr elimizde sheteldik 4 joǵary oqý ornynyń fılıaly ashyldy, bıyl 6 fılıal ashylady. Atap aıtqanda, Qorqyt ata atyndaǵy Qyzylorda ýnıversıteti janynan Seýl ulttyq ǵylym jáne tehnologııa ýnıversıtetiniń fılıaly ashylmaq. 18-19 mamyrda Memleket basshysynyń Qytaı eline sapary josparlanyp otyr. Sonyń aıasynda Qytaıdyń ulttyq Tıantszın jáne Sıan tehnologııalyq ýnıversıtetimen fılıal ashý týraly kelisimge qol qoıylmaq», - dedi Saıasat Nurbek Astanada ótip jatqan Azııa ýnıversıtetteri alıansynyń forýmy barysynda BAQ ókilderiniń saýalyna jaýap bere turyp.

Mınıstrdiń aıtýynsha, aldaǵy 3-5 jyldyń ishinde joǵary bilimniń mazmuny men kelbeti aıtarlyqtaı ózgeredi. Joǵary bilim berý salasynda báseke artady.

«Bizdiń jastar álemniń aldyńǵy qatarly ýnıversıtetteriniń fılıalynda bilim alý múmkindigi bar. Olardyń arasynda AQSh, Ulybrıtanııa, Germanııa, Qytaı, Ońtústik Koreıa, Túrkııa jáne taǵy basqa elderdiń JOO bar», - deıdi vedomstvo basshysy.

Buǵan deıin Úkimet basshysy Álıhan Smaıylov 2029 jylǵa qaraı elimizde álemdik 9 ýnıversıtettiń fılıaly ashylatyny týraly aıtqan edi.

Aıta keteıik, Astanada Azııa ýnıversıtetteri alıansynyń forýmy ótip jatyr.