Bıyl elimizde 51 myń jańa kólik satylǵan
NUR-SULTAN. QazAqparat – Avtonaryqty taldaý jáne monıtorıngileý ortalyǵy Qazaqstannyń bıylǵy jartyjyldyqtaǵy avtonaryǵy men avtoparkine sholý jasady, dep habarlaıdy QazAqparat.
Qańtar-maýsymda elimizde 51,8 myń jańa kólik satylǵan
Bul – jeńil avtomobıl, LCV, júk kólikteri, arnaıy tehnıka men avtobýstardy qosa eseptegendegi kórsetkish jáne 2021 jyldyń alǵashqy jartyjyldyǵyndaǵy saýdanyń 92,3% quraıdy. Aqpan men naýryzda saýda byltyrǵy deńgeıden asyp tússe, qańtarda, sáýirde jáne mamyrda kórsetkishter byltyrǵydan tómen bolǵan. Maýsymda jańa avtokólik saýdasy byltyrǵy deńgeıge jetti.
Elektrondy quramdastardyń tapshylyǵy, jahandyq ınflıatsııa, Shyǵys Eýropadaǵy geosaıası turaqsyzdyq pen logıstıkalyq tizbektiń ajyrap ketýi álemdik avtomobıl naryǵyn áli de qyspaqqa alyp jatyr.
«Qazaqstan naryǵyndaǵy jaǵdaıǵa Reseı Federatsııasynan avtokólik pen mashına jıyntyqtaryn jetkizýdiń kúrt qysqarýy úlken áser etti. Osyndaı jaǵdaılardan keıin 6 aıdyń qorytyndysy boıynsha, jańa tehnıkanyń jalpy saýdasy 7,7%-ǵa tómendegeni baıqaldy. Degenmen, buǵan deıin aıtylǵandaı, jekelegen aılarda saýda byltyrǵy deńgeıden asyp túsken. Sonymen birge Qazaqstanda jasalǵan avtokólikterdiń naryqtaǵy úlesi 80%-ǵa deıin ósip otyr. Jalpy alǵanda, álemdik naryqta 6 aıda saýdanyń 8,5%-ǵa tómendegeni baıqaldy. Barlyǵyn qosqanda jyl basynan beri álemde 38 mln 468 myń avtomobıl satylǵan», - deıdi Avtonaryqty taldaý jáne monıtorıngileý ortalyǵy.
Qazaqstan avtonaryǵyndaǵy 5 úzdik brend
Qazaqstandyq satyp alýshylar suranysyndaǵy 5 úzdik brend qatarynda Hyundai, Chevrolet, Kia, Lada, Toyota avtomobılderi bar. Naryqtaǵy úzdik bestik quramy ótken jyldan ózgergen joq, dese de Toyota satylymy 35,6%-ǵa tómendedi. Ol Sankt-Peterbýrgten Camry men RAV4 modelderin jetkizýdiń toqtaýymen baılanysty. Bıylǵy 6 aıdaǵy úzdik bestiktegi markalardyń úlesi elimizdegi jańa avtokólikke jalpy suranystyń 78,5%-yn qurady, byltyr bul kórsetkish 73,8% bolǵan edi.
Alǵashqy jartyjyldyq qorytyndysy boıynsha otandyq kásiporyndar 51 565 tehnıka shyǵarǵan. Óndiris byltyrǵy kezeńmen salystyrǵanda 30%-ǵa ósken. Mashına jasaý salasyndaǵy avtomobıl óndirisiniń úlesi – 37,5%. Júk avtomobıli óndirisi 9,4%-ǵa qysqarǵan, al ózge barlyq tehnıka túrlerin óndirýde ósim bar. Kedendik-tarıftik kedergilerdiń jeńildetilgenine qaramastan kóliktiń bul túrine ımport ta tómendedi.
Qazaqstan avtomobıl naryǵyna aıtarlyqtaı áser etken jaıt –kórshiles elderdegi óndiris dınamıkasyndaǵy ózgerister. Reseıde 2022 jyldyń alty aıynda 281 myń jeńil avtomobıl shyǵarylǵan, bul byltyrǵy kórsetkishten 61,8%-ǵa tómen. Oǵan qosa, 2022 jáne 2023 jyldarǵa álemdik avtomobıl óndirisiniń bazalyq boljamy 2,6 mln-ǵa: tıisinshe 81,6 mln-ǵa jáne 88,5 mln-ǵa deıin tómendetilgen.
Elde 4 mıllıonǵa jýyq jeńil avtokólik bar
1 shildedegi jaǵdaı boıynsha Qazaqstanda 3 mln 907 myń 214 jeńil avtomobıl tirkelgen. Osy kórsetkish boıynsha atalǵan kezeńde 1,65%-ǵa ósim baıqaldy. 2021 jyldyń 1 shildesinde tirkelgen avtomobılder parkinde 3 mln 843 myń 826 kólik bolǵan edi.
Óńirler bólinisinde 2022 jyldyń 6 aıynda Aqmola oblysynda 157 461 jeńil avtokólik tirkelgen. Aqtóbede – 144 161, Almatyda – 501 485, Atyraýda – 102 164, Batys Qazaqstanda – 114 799, Jambyl oblysynda – 217 085, Qaraǵandy – 249 932, Qostanaıda – 166 978, Qyzylordada – 97 338, Mańǵystaýda – 129 976, Pavlodarda – 151 609, Soltústik Qazaqstanda – 129 491, Túrkistanda – 162 078, Shyǵys Qazaqstan – 253 061, Nur-Sultanda – 285 381, Almaty qalasynda – 463 698, Shymkentte – 135 116 jeńil kólik bar. 34 342 kólikte dıplomatııalyq nómirler bolsa, 238 776 kóliktiń óńiri kórsetilmegen.
Statıstıkaǵa sáıkes, alǵashqy jartyjyldyqta respýblıkanyń ár 1000 turǵynyna shaqqanda 180 avtomobıl bary anyqtaldy. Óńirler boıynsha eń kóp avtokólik Almaty oblysynda tirkelgen – 1 000 turǵynǵa 231 avtokólik, eń tómen kórsetkish Túrkistan oblysynda – 1 000 turǵynǵa 76 avtokólik. Avtojúrgizýshilerdiń 89 paıyzy – benzın, 2 paıyzy – dızel jáne 9 paıyzy – aralas otyn tutynady.
Avtokólikke jahandyq tapshylyq bar, jyl sońyna boljam qandaı
2022 jyly avtomobıl naryǵy áli de jahandyq tapshylyq qyspaǵynda otyr. Ol elimizge Reseı Federatsııasynan jetkiziletin avtokólik men mashına jıyntyqtarynyń qysqarýyna alyp keldi. Avtonaryqty taldaý jáne monıtorıngileý ortalyǵynyń habarlaýynsha, ekinshi jartyjyldyq nátıjesi naryq qatysýshylarynyń beıindiligimen jáne valıýta naryǵyndaǵy jaǵdaıǵa qaraı aıqyndalatynyn kórsetti.
«Kópshiligi áliptiń artyn baǵýdy uıǵarǵan. Bizdiń klıentterimiz de sońyn kútip otyr, bálkim rýbl arzandap qalar, onda baǵa da óz qalpyna keledi. Biz tek jaǵdaıǵa ıkemdele alamyz. Klıentter de beıimdele tústi, bireýler júrilgen kólikterdi tańdaıdy, shuǵyl kólik satyp alǵysy keletinder – bizden alady. Saýda toqtap qaldy dep aıtýǵa kelmeıdi. Saýda júrip jatyr, biraq óte baıaý júrýde», – dep pikir bildirdi «Vıraj» kompanııalar toby.
«Allur» kompanııasynyń aıtýynsha, álemdegi saıası-ekonomıkalyq ahýalǵa qaramastan, naryq saýdanyń qalpyna kelgenin kórsetip otyr. Brendter áli de logıstıkalyq protsesterdi rettep jatyr, ekinshi jartyjyldyqta jańa avtomobılder óndirilip, jetkiziledi dep kútýde.
«Terra Motors» kompanııasy birinshi jartyjyldyqqa qaraǵanda ekinshi jartyjyldyq áldeqaıda tabysty bolady degen optımıstik boljamyn bólisti. Oǵan dıstrıbıýterlerdiń qabyldap jatqan sharalary kómektesedi.
«Barlyq qıyndyqtarǵa qaramastan, Hyundai Trans Kazakhstan zaýyty tolyq qýatyna kóship, avtomobıl óndirisin odan ári arttyryp, modelder qataryn keńeıtip jatyr. «Astana Motors» quramyndaǵy keıbir dıstrıbıýtorlar jańa logıstıkalyq baǵdarlardy qarastyrýda, óıtkeni jekelegen avtokólik brendteri RF arqyly tranzıtpen tasymaldaýdy doǵardy. Osyǵan baılanysty Qazaqstanǵa avtomobıl jetkizýde qıyndyqtar týyndap otyr», – deıdi «Astana Motors» QMK.
Avtonaryqty taldaý jáne monıtorıngileý ortalyǵynyń boljamynsha, saýdadaǵy qazirgi dınamıka saqtalyp, logıstıka jumysy rettelse, naryq byltyrǵy deńgeıden taǵy 10%-ǵa artady. Al boljamnyń oryndalý yqtımaldyǵy eldegi makroekonomıkalyq jaǵdaıǵa jáne avtobólshekter men tehnıkany turaqty jetkizilýine baılanysty bolmaq.
