Bıyl elimizde 5 myń stýdentke jataqhana beriledi
ASTANA. QazAqparat - Bıyl 5 myń jataqhana orny paıdalanýǵa beriletin bolady. Bul týraly búgin Úkimettiń selektorlyq rejimdegi otyrysynda QR Bilim jáne ǵylym mınıstri Erlan Saǵadıev aıtty, dep habarlaıdy QazAqparat tilshisi.
Mınıstrdiń aıtýynsha, jataqhanalarda jańa oryndardy paıdalanýǵa berý jumystary jalǵasýda.
«Osy 2019 jyly 5 myń oryndy paıdalanýǵa berýdi josparlap otyrmyz. Qazirgi ýaqytta, 3 jarym aı ishinde bizge 11 myńnan astam orynǵa 20 ótinish kelip tústi. 6 myń 500 orynǵa 12 shart jasaldy. Olardyń kóbi salyna bastady. Qazirgi esep boıynsha 5 myń oryn tolyǵymen bıylǵy jyly beriledi. Sonymen qatar, osy aıdyń sońyna deıin 4 myń alty júz orynǵa taǵy 8 shart jasaý josparlanýda. Ol kelesi jyly beriletin jobalar», - dedi Erlan Saǵadıev.
Onyń aıtýynsha, joba iske asqannan bastap bilim berý uıymdary óz qarajaty esebinen 3 myńǵa jýyq oryndyq 10 jataqhanany ózderi salyp paıdalanýǵa berdi. Olar: Almaty, Shymkent, Atyraý, Qaraǵandy, Shyǵys Qazaqstan jáne Túrkistan oblystary.
«Jalpy, 2022 jyldyń sońyna deıin 75 myń jańa oryndy paıdalanýǵa berý úshin barlyq jaǵdaı jasalǵan. 170 jer ýchaskesi anyqtalǵan. Olardyń 121-i bilim berý uıymdaryna tıesili, 49-yn ákimdikter bólgen. 27 uıym jobalyq-smetalyq qujattama ázirledi, 62-si ázirlenip jatyr. Biz ázirlengen jáne úlgilik JSQ bankin qurdyq, ony jobanyń jańa qatysýshylary paıdalana alady», - dedi Erlan Saǵadıev.
Mınıstr dereginshe, 107 joba boıynsha qarjylandyrý kózderi anyqtaldy. 50 jobany joǵarǵy oqý oryndary men bankterdiń qarajaty esebinen, 57 jobany ınvestorlardyń qarajaty esebinen iske asyrý josparlanyp otyr.
