Bıyl elimizde 37 mıllıard tekshe metr gaz óndirilmek
ASTANA. Qazannyń 12-si. QazAqparat /Rýslan Ǵabbasov/ - Elimizde 2010 jyly 80 mıllıon tonna munaı men gaz óndirý josparlanyp otyr. Bul týraly búgin 9 aıdy qorytyndylaǵan Úkimet otyrysynda Munaı jáne gaz vıtse-mınıstri Áset Maǵaýov aıtty.
Onyń sózine qaraǵanda, bul 2009 jyldyń deńgeıine qaraǵanda 4,6 paıyzǵa artyq. Sonymen qatar bıyl eksport 73 mıllıon tonna kóleminde belgilenýde.
Vıtse-mınıstr sonymen qatar osy jyly 2,8 mıllıon tonna benzın, 3,9 mıllıon tonna dızel otynyn óndirý josparlanyp otyrǵandyǵyn jetkizdi.
«Munaı óndiretin kompanııalardyń málimeti boıynsha bıylǵy jyldyń 9 aıynda gaz kondensatyn qosqanda 58,9 mıllıon tonna munaı óndirildi. Bul kórsetkish ótken jyldyń deńgeıine qaraǵanda 104,8 paıyzdy qurady»,-dedi Á. Maǵaýov. Onyń aıtýynsha, munaı men gaz, sondaı-aq gaz kondensatynyń eksporty 52,9 mıllıon tonnaǵa jetti. Bul ótken jyldyń deńgeıine qaraǵanda 105,9 paıyzdy qurady. Munymen qosa, 9 aıdyń ishinde gazdy óndirý elimizde 27,2 mıllıard tekshe metrdi qurady (ótken jyldyń deńgeıine qaraǵanda 103,7 paıyz).
«2010 jyly boljam boıynsha gaz óndirý 37 mıllıard tekshe metrdi quramaq. Bul kórsetkish 2009 jyldyń deńgeıine shaqqanda 102,7 paıyzǵa jetedi»,-dedi Á. Maǵaýov.
