Bıyl elimizde 300-den asa pılotsyz ushý apparaty esepke alyndy - komıtet

ASTANA. QazAqparat - Drondardy paıdalanýshylardyń qatary artqan saıyn olardy tirkeý men ushý apparattaryn tıimdi paıdalaný erejesi týraly másele kóterilýde, dep habarlaıdy QazAqparat Azamattyq avıatsııa komıtetine silteme jasap.

Vedomstvo tóraǵasynyń orynbasary Ardaq Ótepovtiń aıtýynsha, sońǵy ýaqytta áýesqoı jáne kommertsııalyq maqsattaǵy aerofototúsirilim barysynda jáne túrli taýarlardy jetkizý, kásibı taldaý jumystary kezinde pılotsyz ushý apparattary keńinen qoldanyla bastady. Drondardy paıdalanýshylar qatary jıilegen saıyn olardy tirkeý men ushý apparattaryn tıimdi paıdalaný erejesi týraly másele kóterilýde.

«Qazaqstannyń avıatsııa ákimshiligi ushý apparattaryn tirkeýge alý, olardy alǵashqy daıarlyqtan ótkizý jáne sertıfıkat berý, sonymen qatar halyq tyǵyz qonystanǵan qalalyq aýdandarda, kentter men eldi mekenderde ushýǵa ruqsatnama berý jumystaryn iske asyrady», – dedi Ardaq Ótepov.

Búginde elimiz boıynsha 301 pılotsyz ushý apparattary esepke alynǵan. 2021-2022 jyldary ushqyshsyz basqarylatyn ushý apparattaryna 223 sertıfıkat, avıatsııalyq jumystarǵa ruqsat beretin 34 qujat jáne halyq tyǵyz qonystanǵan aýdandarda ushýǵa ruqsat beretin 20 qujat berilgen.

Bıyl Qazaqstannyń áýe keńistigin paıdalaný týraly zańnamaǵa birqatar túzetý engizilmek. Onyń sheńberinde ushqyshsyz basqarylatyn ushý apparattaryna jańa talaptar da qarastyrylǵan. Atap aıtqanda, pılotsyz ushý qurylǵylaryna arnalǵan aımaq pen pılotsyz apparattardyń ushýyna shekteý qoıatyn aımaq engizilmek.

Vıdeodan alynǵan kadr