Bıyl elimizde 30 otbasylyq sútti-taýarly ferma men 30 sút qabyldaıtyn beket iske qosylady

ASTANA. QazAqparat - Osy jyly elimizde 30 otbasylyq sútti-taýarly ferma men 30 sút qabyldaıtyn beket iske qosylady dep josparlanýda. Bul týraly búgin Ortalyq kommýnıkatsııalar qyzmetinde ótken brıfıngte «Aýyl sharýashylyǵyn qarjylaı qoldaý qory» AQ basqarma tóraǵasy Narmuhan Sarybaev málim etti.

Onyń aıtýynsha, QR Prezıdenti Qazaqstannyń et pen sút ónimderin shyǵarý boıynsha iri aımaqtyq eksporterge aınalýy tıistigin birneshe ret atap ótken bolatyn. «Elbasy óz Joldaýynda rentabeldiligi tómen daqyldardy óńdeýden kókónis, maıly daqyldar men jem-shóp óńdeýge kóshý qajettiligin de aıtady. Elbasynyń osy tapsyrmalaryna sáıkes Qor 4 jańa nesıelik ónimdi engizdi», - dep atap ótti ol. Qor basshysynyń aıtýynsha, sút salasyn damytý maqsatynda otbasylyq sútti-taýarly fermalardy qurý jáne sút qabyldaıtyn beketterdi ashýǵa baǵyttalǵan «Yrys» baǵdarlamasy ázirlenip, óz jumysyn bastady. «Bul baǵdarlama fermerlerge tehnıka men tehnologııalardy jańartýǵa, sútti asyl tuqymdy mal satyp alýǵa, sút qabyldaý beketterin ashýǵa múmkindik beredi. Jobalardy júzege asyrý jeke sharýashylyqtardan sútti jınap, sút óńdeýshilerdiń qýattylyǵyn arttyryp, ınnovatsııalyq tehnologııalardy paıdalanatyn sútti-taýarly fermalardy qurýǵa, olardyń tıimdiligi men súttiń sapasyn kóterýge, elimizge sút ónimderiniń ımportyn azaıtýǵa baǵyttalǵan. Osy jyly biz 30 otbasylyq sútti-taýarly ferma men 30 sút qabyldaıtyn beketti iske qosamyz degen josparymyz bar», - dedi N.Sarybaev.