Bıyl elimizde 27 bala sýǵa batyp, kóz jumǵan
ASTANA. QazAqparat - Bıyl alty aıdyń ishinde 27 bala sýǵa batyp, qaza tapty, dep habarlaıdy QazAqparat.
Bul týraly búgin Ortalyq kommýnıkatsııalar qyzmetinde ótken baspasóz máslıhatynda QR ІІM Tótenshe jaǵdaılar komıtetiniń resmı ókili Rýslan Imanqulov málim etti.
«Búgingi tańda ata-analarǵa arnaıy jadynamalar, áleýmettik jeliler arqyly nusqaýlyqtardy taratý jáne balalar úshin ınteraktıvti sabaqtar ótkizý, ekskýrsııalar men ashyq esik kúnderin uıymdastyrý jumystary qarqyndy júrgizilýde. Balalar bizdiń bolashaǵymyz, bizdiń baılyǵymyz dep jatamyz, degenmen balalardyń qatysýymen oryn alatyn tótenshe jaǵdaılar tolastar emes. Jalpy Qazaqstan boıynsha, bıyl 27 bala sýǵa batyp ketken. Bul negizinen ata-analardyń balalaryna salǵyrt qaraýynan oryn alyp jatady. Mysaly, Almaty oblysynda bir otbasynyń úsh birdeı jetkinshegi úıdiń janynan aǵyp jatqan sýaǵar aryqqa batyp óldi», - dedi R. Imanqulov.
Osyǵan oraı, komıtettiń resmı ókili búgin, Balalardy qorǵaý kúni merekesi tusynda ata-analarǵa balalaryna saq bolýǵa shaqyrdy.
«Balalar úshin keń taraǵan taǵy bir qaýipterdiń biri - órt. Jyl basynan beri bizdiń elde, ókinishke oraı, órt kezinde 7-12 jas aralyǵyndaǵy 10 bala qaza tapty. Taǵy 27 bala jaraqattandy. Ol oqıǵalardyń basym bóligi eresekterdiń jáne ata-analardyń qaraýynsyz qalǵan kezinde bolady», - deıdi ol.
