Bıyl elimizde 23,4 mln tonna jemshóp daıyndaldy

NUR-SULTAN. QazAqparat – Búginde elimizde qysqy mal azyǵyn daıyndaý qarqyndy júrip jatyr. Qazirgi tańda jemshóptiń 98 paıyzy daıyn jáne qazan aıynyń ortasynda bul naýqan tolyq aıaqtalady dep kútilýde. Bul týraly QR Aýyl sharýashylyǵy mınıstriniń birinshi orynbasary Aıdarbek Saparov málim etti, dep habarlaıdy QazAqparat tilshisi.

«Búginde elimizde 23,4 mln tonna jemshóp daıyndaldy. Bul - qajet kólemniń 98 paıyzy. Qazan aıynyń ortasyna deıin jemshóp ázirleýdi aıaqtaımyz. Mańǵystaý óńirin jemshóppen qamtýǵa kelsek, qazirgi ýaqytta 65 paıyzǵa daıyn. Qalǵan bóligi basqa oblystarmen kelisimshart jasasý arqyly jetkiziledi. Bul jerde problema joq. Odan bólek, elimizdiń soltústik óńirlerinde qaýyrt jaǵdaı úshin jemshóp bazasy jasaqtalyp jatyr», - dedi Aıdarbek Saparov OKQ-de ótken baspasóz máslıhatynda.

Vıtse-mınıstr keltirgen statıstıkaǵa súıensek, búginde elimiz boıynsha 1,5 mln tonnadan astam senaj (94%), 1,2 mln tonna sılos (53%) jáne 3,5 mln tonnaǵa jýyq tonna saban (61%) daıyndaldy.

Buǵan deıin mınıstrdiń birinshi orynbasary elimizdiń astyq eksporty áleýeti týraly aıtyp berdi.

A. Saparovtyń aıtýynsha, bıyl elimiz 6-6,5 mln tonna kóleminde astyq eksporttaýdy josparlap otyr. Jáne astyq Aýǵanstan, Iran jáne Ortalyq Azııa elderine shyǵarylady.

Odan bólek, spıker egistik alqapty kıikter taptap tastaýynan shyǵynǵa batqan otandyq fermerlerdiń janaıqaıyna jaýap bergen edi.