Bıyl elimizde 17 mln sharshy metr baspana salynady

NUR-SULTAN. QazAqparat – QR Indýstrııa jáne ınfraqurylymdyq damý mınıstrligi «sharshy metr qurylysy» saıasatynan «sapaly ómir ortasy» saıasatyna kóshpekshi. Bul týraly vedomstvo basshysy Qaıyrbek Óskenbaev Úkimet otyrysynda aıtty, dep habarlaıdy QazAqparat tilshisi.

«2021 jyldyń qorytyndysy boıynsha respýblıka boıynsha 17,1 mln sharshy metr (ósim +11,4%) jańa turǵyn úı salyndy.

Bul 151 myń azamatqa ózderiniń turǵyn úı jaǵdaılaryn jaqsartýǵa múmkindik berdi.

Turǵyn úı qurylysyna salynǵan ınvestıtsııalar ótken jyldyń tıisti kezeńimen salystyrǵanda 19,1% ósip, 2,4 trln teńge boldy.

Bıyldan bastap jer resýrstaryn tıimdi paıdalaný, kóshe-jol jelisin damytý jáne qoǵamdyq keńistikterdiń sapasyn arttyrý esebinen jınaqy jáne alýan túrli qurylys salý arqyly «sharshy metr qurylysynan» jaıly ómir súrý ortasyn qalyptastyrýǵa kóshýdi josparlap otyrmyz», - dedi mınıstr.

Bul saıasat aıasynda azamattardyń turǵyn úı máselelerin sheshýdiń negizgi tásilderi sýbsıdııa tóleý, turǵyn úıdi jalǵa alýǵa arnalǵan turǵyn úı tólemderi, qurylys salýshylardan daıyn turǵyn úı satyp alý, «eski oramdardy» renovatsııalaý, problemalyq obektilerdi aıaqtaý sharalaryna basymdyq berýdi kózdeıdi.

«Osyny eskere otyryp, bıylǵy jylǵa turǵyn úıdi iske qosýdyń jyldyq kólemin 17 mln sharshy metr dep belgileýdi usynamyz», - dedi Qaıyrbek Óskenbaev.