Bıyl elimizde 17 márte kóshkin júrip, 5 sel tirkelgen - TJK
NUR-SULTAN. QazAqparat - Tótenshe jaǵdaılar komıteti jáne «Qazseldenqorǵaý» mekemesi sel, syrǵyma qaýipti kezeńine daıyndyq, muzdaq kólderde tekserý jáne sýdy qaýipsiz deńgeıge tómendetý boıynsha aldyn alý jumysyn uıymdastyrdy. Bul jóninde komıtettiń baspasóz qyzmetine silteme jasap QazAqparat habarlaıdy.
Naýryz-mamyr aılarynda «Qazseldenqorǵaý» MM mamandary Túrkistan, Almaty oblystarynda jáne Almaty qalasynda 17 kóshkin protsesin jáne 5 sel tirkegenin atap ótý qajet.
Bıyl osy qaýipti gıdrogeologııalyq qubylystardyń kóbeıýine qarqyndy qar erý jáne mol jaýyn-shashyn túsýi sebep boldy. Sonyń saldarynan topyraqta ylǵal artqan (2 metrge deıin), al ol sel men kóshkin protsesterine ákeldi.
Qazirgi tańda tómen taýly aımaqtarda turǵyn úı men basqa qurylystardyń, avtojoldardyń jáne ınjenerlik kommýnıkatsııalardyń retsiz ıntensıvti salynýy jalǵasýda. Turǵyn úı qurylysy taý betkeıine júktemeni arttyrdy, ol ınjenerlik-geologııalyq protsesterdiń jandanýyna ákeldi.
Bıyl «Qazseldenqorǵaý» MM mamandary TJD jáne jergilikti atqarýshy organdarmen birlesip qaýipti ýchaskelerde 366 jerústi sholýyn ótkizdi. Sondaı-aq Aqsaı, Karǵaly, Úlken jáne Kishi Almaty, Talǵar, Uzynqarǵaly, Qaskeleń, Bıen, Aqsý, Basqan, Sarqan, Lepsi, Esik, Kúngeı Alataý, Qora, Chaja, Kóksý, Ósek, Korǵas (Almaty oblysy), Gromotýha, Ýba, Turǵysyn (ShQO) ózenderiniń basseınderinde 6 aerokózben sholý júrgizildi.
Kóshkin men sel týraly eskertý úshin ózen arnalaryndaǵy qaýipti ýchaskelerde jáne avtojoldarda 214-ke jýyq aqparattyq qalqan jáne eskertý belgisi qoıyldy. Uıym-kásiporyn basshylary, sondaı-aq baý-baqsha qoǵamdary TJD-men birlesip 800 habarlama-usynym berdi, 947 broshıýra taratty.
Pasporttaýdan keıin muzdyq jáne úıindi kólderdiń sany 942 boldy (Almaty oblysy – 680, ShQO – 146, Túrkistan oblysy – 44, Almaty qalasy – 45, Jambyl oblysy - 27).
Shilde jáne qyrkúıekke deıin 17 muzdaq kólde aldyn alý is-sharalaryn, atap aıtqanda kanal men sıfon ornatý, jarylys jáne jer jumystaryn júrgizý kózdelgen.
Taýly ózenderdiń gıdrometeorologııalyq jaǵdaıyn baǵalaý jáne baqylaý úshin 106 beket jáne 29 dıspetcherlik pýnkt táýliktik monıtorıng uıymdastyrǵan.
Sel men kóshkin kezinde der kezinde áreket etý úshin avarııalyq-mehanıkalandylyrǵan 12 brıgada qurylǵan.
