Bıyl elimiz boıynsha 18-18,9 mln. tonna astyq alý josparlanyp otyr - A.Mamytbekov
TANA. 22 tamyz. QazAqparat /Rýslan Ǵabbasov/ - Bıyl elimiz boıynsha 18-18,9 mln. tonna astyq alý josparlanyp otyr. Bul týraly búgin selektorlyq rejımdegi Úkimet otyrysynda Aýyl sharýashylyǵy mınıstri Asyljan Mamytbekov málim etti.
Mınıstrdiń paıymdaýynsha, aǵymdaǵy jyly astyq shyǵymdylyǵy turǵysynda ońtaıly agrometeorologııalyq jaǵdaı qalyptasyp otyr. Osy oraıda oblystardyń aqparattaryna qaraǵanda, bıyl 18-18,9 mln. tonna astyq shyǵymdylyǵy boljanýda. Onyń ishinde bıdaı kólemi 14,5 mln. tonnaǵa jetpek.
Atap aıtqanda, búginde Aqmola jáne Qostanaı oblystarynan basqa ózge óńirler egin oraǵyna kirisip otyr. Vedomstvo basshysynyń sózine qaraǵanda, Soltústik Qazaqstan oblysy búginde 7,6 mln. gektar egis alqabynyń 1,2 mln. gektaryn oryp aldy. Osynyń nátıjesinde 1,7 mln. tonna astyq qyrmanǵa tústi. A. Mamytbekovtyń aıtýynsha, astyq shyǵymdylyǵynyń ortasha kórsetkishi gektaryna 14,4 tsentnerdi qurap otyr. Soltústik Qazaqstan oblysy boıynsha astyq shyǵymdylyǵynyń ortasha kórsetkishi gektaryna 16,7 tsentnerge jetip otyr. Bul ótken jylǵa qaraǵanda 50 paıyzǵa joǵary. «Aǵymdaǵy jyly jalpy egistik kólemi 21,2 mln. gektardy qurady. Onyń ústinde dándi daqyldar egistigi 16,2 mln. gektarǵa jetti. Osy 16,2 mln. gektardyń 13,8 mln. gektary - bıdaı alqaptary», - dedi mınıstr.
Budan basqa, elimizde egilgen maqta egistikteri -160 myń gektar, qant qyzylshasy - 21 myń gektar, kartop jáne basqa da kókónis daqyldary - 381 myń gektardy quraıdy.
