Bıyl el aýmaǵynda bolǵan orman órtteriniń 30 paıyzy Pavlodar oblysyna tıesili - QR AShM
ASTANA. 9 qazan. QazAqparat - Orman órtterinen kelgen shyǵyn respýblıka boıynsha 531 mln. teńgeni qurady.
Bul týraly búgin selektorlyq rejımdegi Úkimet otyrysynda QR Aýyl sharýashylyǵy mınıstri Asyljan Mamytbekov málim etti.
«Bıyl qatty qýańshylyq jaılaǵan jyldardyń biri boldy. Kúnniń tym ysyp ketýi, jaýynnyń az bolýy, sondaı-aq orman qory aýmaǵyndaǵy shóptiń qýrap ketýi saldarynan joǵary dárejedegi órt qaýpi oryn aldy. Jyl basynan beri memlekettik orman qorynyń aýmaǵynda 5 myń 806 gektar alqapta orman órtteriniń 640 oqıǵasy tirkeldi. Orman órtterinen kelgen shyǵyn respýblıka boıynsha 531 mln. teńgeni qurady», - dedi mınıstr.
Onyń sózinshe, orman órtteriniń barynsha kóp jerdi qamtýyna Pavlodar, Aqmola jáne Qostanaı oblystarynda jol berildi. Pavlodar oblysynda 1731 gektar nemese respýblıka boıynsha órtterdiń jalpy kóleminiń 30 paıyzyn qamtydy. Al Aqmola oblysynda órt 1449 gektarǵa (25 paıyzy) jáne Qostanaı oblysynda 1441 (25 paıyzy) gektarǵa jaıylǵan.
