Bıyl el astanasyna 200 myńnan astam sheteldik týrıst kelýi múmkin

NUR-SULTAN. QazAqparat – Nur-Sultan qalasy Investıtsııalar jáne kásipkerlikti damytý basqarmasynyń basshysy Erjan Baltaev bıyl astanaǵa qansha týrıst kelýi múmkin ekenin málim etti, dep habarlaıdy QazAqparat tilshisi.

«Bıyl búkil shekara ashylady – qurlyqtyq shekara da, áýe shekarasy da. Vızasyz rejım boıynsha da shekteýler alynyp tastaldy. Qazir 73 baǵyttaǵy memleket boıynsha vızasyz saparǵa jol ashyq. Osyǵan baılanysty bizge týrısterdi tartý jumysyn jandandyrý kerek. Onyń ústine, ózderińiz biletindeı, týrızmdi damytýǵa arnalǵan Ulttyq joba qabyldandy. Sonyń aıasynda Nur-Sultan qalasy boıynsha birqatar maqsat qoıylǵan. Naqtyraq aıtsaq, el ishinen elordaǵa qatynaıtyn týrısterdiń de, ózge memleketterden keletin týrısterdiń de sanyn kóbeıtý qajet. Pandemııa kezinde ishki týrısterdiń sany artqanyn kórdik. Jalpy qazaqstandyqtardyń týrıstik obekterge degen qyzǵýshylyǵy artty. Shetelden keletin týrıster týraly aıtsaq, ókinishke qaraı, olardyń sany kemidi. 1 jylda Nur-Sultanǵa shamamen 78 myń týrıst kelgen. Ulttyq joba boıynsha, bıyl 263 myń sheteldik týrıst tartý josparlanǵan», - dedi basqarma basshysy qalalyq máslıhattyń turaqty komıssııa otyrysynda.

Sondaı-aq, ol qala ishinde týrıster tasymaldaıtyn qosqabatty avtobýstar áli de qyzmet kórsetetinin atap ótti.

«Buryn 3 avtobýs bar edi. Pandemııa kezinde onyń bireýi Aqtaýǵa jiberildi. Ol jaqta da týrızm damyp keledi. Sonda bıyl eki avtobýs týrıst tasymaldaıdy. Bul sharaǵa 5 mln 600 myń teńge qarastyrylǵan», - dedi Erjan Baltaev.

Kazakh Tourism-niń málimeti boıynsha, elde ishki týrızmge suranystyń artýyna baılanysty qonaq úıler men demalys oryndary qyzmeti 90%-ǵa artqan.