Bıyl EKSPO aýmaǵyna 2 mektep salynady
ASTANA. QazAqparat - 2018 jyly elordada 7 myń orynǵa arnalǵan 6 jańa mektep turǵyzylady. Bul týraly qala ákimi Áset Isekeshev halyqqa esep berý kezdesýinde aıtty, dep habarlaıdy QazAqparat tilshisi.
Ákimniń aıtýynsha, Astanada mektep oryndarynyń jetispeýshiligi men bilim sapasy áli de ózekti másele bolyp otyr. Jyl saıyn qala mektepterinen 10 myń bala túlep ushsa, birinshi synypqa 28 myń bala qabyldanady. Sol sebepti Astananyń 11 mektebi úsh aýysymda jumys isteýge májbúr.
«Qazir Úkimettiń qoldaýymen arnaıy baǵdarlama boıynsha jumys istep jatyrmyz. Bıyl 7 myń orynǵa arnalǵan 6 mektep turǵyzylady. Bir mektep apatty jaǵdaıdaǵy №20 mektep ornyna salynady. Taǵy bir mektep Abaı-Bıgeldınov kósheleriniń qıylysynda turǵyzylyp, №56, 60, 35 jáne 1 mekteptegi oqýshylar sanyn azaıtýǵa septigin tıgizbek. EKSPO aýdanyndaǵy jańa baspana turǵyndary úshin 2 mektep boı kóterip, №74, 75 jáne 84 mektep oqýshylar sanyn tómendetýge múmkindik beredi. Mektep máselesi boıynsha «Haıvıl» TK turǵyndary júgingen bolatyn, sondyqtan Nájimedenov kóshesiniń boıynsha jańa mektep ashylady», - dep atap ótti Áset Isekeshev halyqqa esep berý kezdesýinde.
Isekeshevtiń aıtýynsha, aldaǵy úsh jylda respýblıkalyq bıýdjet esebinen Astanada 27 mektep pen 10 japsarlas ǵımarat salý josparlanǵan. Sonyń ishinde, «Promyshlennyı», «Prıgorodnyı», «Kóktal 1, 2» turǵyn úı alaptarynda jańa mektepter boı kótermek.
