Bıyl Ekibastuzda jóndelýi tıis 3 km jylý jelisiniń tek 600 metri jóndelgen
«Úılerdegi jylý qondyrǵylaryna jylý berýdi erteń nemese arǵy kúni aıaqtaımyz. Desek te erteń bitiremiz degen úmit basym», - dep málim etti Oleg Krýk.
Brıfıngte BAQ ókilderi Ekibastuz qalasynyń ákiminen 2008 jyldan beri shahardaǵy qansha jylý jelileriniń qansha paıyzy kúrdeli jóndeýden ótkenin surady.
«Naqty 2008 jyldan beri qansha jylý jelileri kúrdeli jóndeýden jáne rekonstrýktsııadan ótkenin dál qazir aıta almaımyn. Bıyl josparlanǵan 3 shaqyrym jylý jelileriniń tek 600 metrine ǵana jóndeý jasaldy. Bul másele qarajatqa tirelip otyr», - dedi Aıan Beısekın.
Ekibastuz qalasynyń ákimi Aıan Beısekınniń málimetine sáıkes, shaharda áli 40-tan astam úı sýsyz, 11 úı jaryqsyz otyr.
Eske sala keteıik, búgin Tótenshe jaǵdaılar mınıstrligi Ekibastuz qalasyna qosymsha kúshter men quraldar jibergen bolatyn.
Ekibastuz jylý elektr ortalyǵynda apat 27 qarashada bolǵan edi. Saldarynan qala turǵyndary jylýsyz qaldy.
Keıinirek jylý qazandyǵynyń isten shyǵýyna baılanysty oblys ákimi bastaǵan jedel shtab quryldy.
Ekibastuz qalasynyń oqýshylary onlaın oqýǵa kóshirildi.
28 qarasha kúni tańerteń qalada jergilikti aýqymdaǵy tótenshe jaǵdaı jarııalandy.
30 qarashada Ekibastuzǵa Premer-Mınıstr Álıhan Smaıylov baryp, kináliler jaýapqa tartylatynyn aıtty.
Keshe, 1 jeltoqsanda QR Prezıdenti Qasym-Jomart Toqaev Ábilqaıyr Sqaqovty Pavlodar oblysynyń ákimi qyzmetinen bosatty. Onyń ornyna ýaqytsha Oleg Krýk taǵaıyndaldy.
Foto: «Pavlodarenergo» AQ