Bıyl eki ushaǵynan aıyrylǵan Malaysia Airlines áýe kompanııasy zor shyǵyndarǵa batty
ASTANA. QazAqparat - Malaysia Airlines áýe kompanııasy qıyndyqtarǵa ushyraýda. 2014 jyldyń ІІ toqsanynda onyń shyǵyndary 305,7 mln rınggıtke (shamamen 97,2 mln. dollarǵa) jetti, dep habarlaıdy Al Arabiya.
Bul ótken jylmen salystyrǵandy tym kólemdi shyǵyn. Sebebi ótken jyldyń dál osy ýaqytynja kompanııanyń shyǵyny eki ese az bolǵan, ıaǵnı 175 mln. rınggıtti (55,6 mln. dollardy) quraǵan. Áýe jelisi qyzmetkerleriniń aıtýynsha, munyń basty sebebi - bıyl birinen soń biri oryn alǵan iri ushaq apattary. Esterińizge sala keteıik, atalmysh áýe kompanııasynyń Kýala-Lýmpýrden Beıjińge bet alǵan MH370 reısi 239 jolaýshysymen 8 naýryz kúni joǵalyp ketken bolatyn. Artynsha, 17 shildede Donetsk oblysynda Amsterdamnan Kýala-Lýmpýrǵa ushyp bara jatqan Boeing 777 jolaýshylar ushaǵy apatqa ushyrap, saldarynan 298 adam ajal qushqan edi. «MH370 reısiniń apatqa ushyraýy men básekelestiktiń artýy saldarynan bıletterdi brondaý 6,7%-ǵa tómendep ketti», delingen kompanııa habarlamasynda. Qazir Malaysia Airlines Malızııa úkimetiniń ınvestıtsııalyq qorynan kómek kútip otyr. Áýe tasymaldaýshysy ekinshi jartyjyldyqtaǵy qarjylyq qorytyndy nátıjeleri budan da nashar bolýy múmkin, dep otyr.
