Bıyl eki azamattyǵy bar 15 myńnan astam qazaqstandyq anyqtaldy

Bul týraly búgin Májilistiń jalpy otyrysynda «Qazaqstan Respýblıkasynyń Úkimeti men Tájikstan Respýblıkasynyń Úkimeti arasyndaǵy kóshi-qon salasyndaǵy yntymaqtastyq týraly kelisimdi ratıfıkatsııalaý týraly» QR Zańynyń jobasyn tanystyrǵan elimizdiń Іshki ister mınıstri Qalmuhanbet Qasymov aıtty, dep habarlaıdy QazAqparat tilshisi.

«Bıyl eki azamattyq alǵan 15260 adamdy anyqtadyq. Onyń 555-in jaýapqa tarttyq. 102 adamdy elden shyǵardyq, qalǵany aıyppul tólep, elden shyǵyp ketti. Sondyqtan aldaǵy ýaqytta eki azamattyq bolmasyn dep arnaıy kelisim jasap jatyrmyz», - dedi mınıstr depýtattardyń saýalyna oraı.

Sonymen qatar Qalmuhanbet Qasymov zań jobasyna oraı Qazaqstan men Tájikstan arasyndaǵy kóshi-qon derekterine de toqtaldy.

«2018 jyldyń 11 aıynda bizge 492 myń Tájikstan azamaty keldi. Onyń tek 56 myńy ǵana tirkelgen. Óıtkeni, olar bes kúnnen keıin tirkelýi tıis. Qalǵandary qyzmet babymen, jeke sharýalarymen kelgen. Týrıster sany 10 myń adamdy quraıdy», - dedi ol.

Onyń aıtýynsha, elimizge kelgen tájik azamattary tarapynan jasalatyn qylmystar da tirkelgen.

«Aǵymdaǵy jyly olar 59 qylmys, ótken jyly 48 jylmys jasaǵan. Bul jalpy qylmys sanynyń 0,02 paıyzyna teń. Negizinen olar bazarlardaǵy usaq-túıek urlyqty quraıdy. Bul máseleni eskerip, sharalar qabyldaıtyn bolamyz. Ákimshilik jaýapkershilikke tartylǵan tájikterdiń 90 paıyzy 5 kúnniń ishinde tirkelip úlgermegen. Endigi ýaqytta biz 30 kún bermekpiz», - dedi mınıstr.

Májilis depýtattary atalǵan zań jobasyn maquldap, Senatqa jiberdi.

Aıta keteıik, Qazaqstan men Tájikstan arasyndaǵy kóshi-qon salasyndaǵy yntymaqtastyq týraly kelisim 2018 jyldyń naýryzynda Astanada jasalǵan bolatyn. Al osy jyldyń shilde aıynda Tájikstan Parlamenti bul zań jobasyn ratıfıkatsııalanǵan edi. Kelisimdi ratıfıkatsııalaý eki eldiń kóshi-qon, azamattardyń quqyqtaryn qorǵaý salasyndaǵy yntymaqtastyǵynyń tıimdiligin arttyrady.