Bıyl egistik kólemi qansha
«Jalpy 2020 jyly aýyl sharýashylyǵy daqyldarynyń jalpy egistik kólemi 22,5 mln ga quraıdy. Dándi jáne dándi-burshaqty daqyldardyń alańy 15,2 mln ga, sonyń ishinde bıdaıdyń alańy – 11,4 mln ga quraıdy» - dedi Aıdarbek Saparov OKQ-da ótken baspasóz máslıhatynda.
Vıtse-mınıstrdiń aıtýynsha Memleket basshysynyń tapsyrmasyn oryndaý maqsatynda egis alqaptaryn ártaraptandyrý jáne joǵary rentabeldi daqyldardy ósirýge kóshý boıynsha jumystar jalǵasyp jatyr. Osylaısha,maıly daqyldardyń josparlanǵan alańy 3 mln ga aýmaqty quraıdy. Bul aýqym ótken jylmen salystyrǵanda 122 myń ga-ǵa kóp.
«Kókónis-baqsha daqyldary men kartoptyń alańy 19 myń tonna, azyqtyq daqyldaryń alańdary 309 myń ga ósimi qamtamasyz etiledi. Tehnıkalyq daqyldardyń (qant qyzylshasy, maqta, temeki) alańy 132 myń ga quraıdy (18,6 myń ga kem). Egis alańdarynyń qurylymyn, eń aldymen, oblys ákimdikterine ishki naryqtyń qajettiligine qaraı jetkizemiz. Mysaly, qaqaqumyqtyń alańynyń 30 myń ga kóbeıýi josparlanǵan. Bul ózimizdi osy daqylǵa degen qajettilikke tolyǵymen qamtamasyz etýge múmkindik beredi», - deıdi ol.
Aıdarbek Saparov atap ótkendeı tuqym daıyndaý máselesiniń de mańyzy zor. Qazirgi tańda 2,5 mln tonna tuqym quıylǵan. Bul tuqymdyq materıalǵa degen tolyq qajettilikti qamtamasyz etedi. Búgingi kúni 1 mln tonna tuqym tekserilip, kondıtsııaǵa 95 paıyzǵa sáıkes keletini anyqtalǵan.
«Oblystardyń jergilikti bıýdjetterinde tuqym sharýashylyǵyn damytýdy sýbsıdııalaýǵa 11,3 mlrd teńge qarastyrylǵan. Qosymsha respýblıkalyq bıýdjet qarajatynan shamamen 29,4 myń tonna tuqym jáne 838,7 myń dana elıtalyq kóshet satyp alýǵa 2,5 mlrd teńge bólindi. Sondaı-aq, joǵary ónimdi alý úshin tyńaıtqyshtardy qoldaný mańyzdy ról atqarady», - deıdi vıtse-mınıstr.