Bıyl egistik alqaby 105 myń gektarǵa ulǵaıdy

NUR-SULTAN. QazAqparat – Bıyl egistik alqaby 105 myń gektarǵa ulǵaıtyldy. Bul týraly QR Aýyl sharýashylyǵy vıtse-mınıstri Ábilhaıyr Tamabek aıtty, dep habarlaıdy QazAqparat tilshisi.

«Ákimdikterdiń deregine sáıkes 2022 jylǵa arnalǵan egis alqaptarynyń boljamdy qurylymy qalyptasty. Jalpy egis alańy - 23,1 mln gektar. Bul 2021 jyldyń kórsetkishinen 105 myń gektarǵa artyq. Jemshóp daqyldarynyń alqaby edáýir ulǵaıtylyp, 3,6 mln gektarǵa jetti. Sondaı-aq kartop, kúnbaǵys, kókónis, ıaǵnı áleýmettik daqyldar alqaby ulǵaıtyldy. Osy jylǵy kóktemgi egis jumystaryn ýaqytyly jáne sapaly júrgizý boıynsha Memleket basshysynyń tapsyrmasyn oryndaý maqsatynda bizdiń mınıstrlik birneshe ret oblys ákimdikterimen keńes ótkizdi», - dedi vıtse-mınıstr ortalyq kommýnıkatsııalar qyzmetindegi baspasóz máslıhatynda.

Onyń dereginshe, egis jumysyn júrgizýge, sharýa qojalyqtaryn tuqymmen, agrohımııamen, tehnıkamen qamtamasyz etýge, qarjylandyrýǵa baılanysty búkil máselelerdi úılestirý maqsatynda respýblıkalyq jedel shtab quryldy.

«Onyń quramyna barlyq múddeli organdar men uıymdar, sondaı-aq oblys ákimderiniń orynbasarlary kirgizildi. Shtab otyrysy apta saıyn ótkiziledi», - dedi Ábilhaıyr Tamabek.