Bıyl egis alqaptarynda joǵary ónim bolatyny boljanýda
TANA. 26 shilde. QazAqparat /Qanat Mámetqazyuly/ - Qazaqstan Respýblıkasy Aýyl sharýashylyǵy mınıstrligi astyq jınaý naýqanyn belsendi júrgizýde.
Bıyl elimizdegi aýyl sharýashylyǵy daqyldarynyń egistik kólemi 21,2 mln. gektardy qurap otyr. Onyń ishinde dándi daqyldar -16,3 mln. gektar bolsa, ondaǵy egilgen bıdaı kólemi -14,1 mln. gektardy quraıdy. Maıly daqyldar - 1,8 mln. gektar aýmaqqa, maqta - 152,3 myń gektar, al qant qyzylshasy - 21,1 myń gektarǵa, kartop pen kókónister 177,5 jáne 188,5 myń gektarǵa egilgen.
«Qazaqstannyń egin egetin negizgi aımaqtarynda agrometeorologııalyq jaǵdaı qolaıly bolýda. Ondaı óńirlerde maýsym jáne shilde aıynyń basynda mol jańbyr jaýǵandyqtan jer ylǵaldyǵynyń jaǵdaıy jaqsy dep baǵalanyp otyr. Egistik jaǵdaıy byltyrǵy jylmen salystyrǵanda birshama jaqsarǵan, atap aıtqanda dándi alqaptyń 99 paıyzy, maıly daqyldar, kúrish jáne maqta egistiginiń 96 paıyzy, qant qyzylshasynyń 85 paıyzy qanaǵattandyrarlyq jaǵdaıda», - delingen baspasóz aıǵaǵynda.
Mınıstrliktiń málimetterine qaraǵanda, egindi jınaý is-sharalaryn qarjylyq qamtamasyz etý baǵytynda jumystar jan-jaqty qabyldandy. Agroónerkásip kesheni sýbektilerin qoldaýǵa qarastyrylǵan 177 mlrd. teńgeniń jalpy 94,4 mlrd. teńgesi kóktemgi egis jáne jıyn-terim jumystaryna jumsalady. Onyń ishindegi 78 mlrd. teńge - bıýdjettik nesıe qarajaty. Soǵan qosa, tıimdi syıaqy mólsheri 12 paıyzdan 8 paıyzǵa deıin tómendetildi.
