Bıyl Dúnıejúzilik Bankpen eki jobany júzege asyrý bastalady - A. Sárinjipov
ASTANA. QazAqparat - Dúnıejúzilik Bank jastar uıymdaryn damytýǵa qoldaý jasaıdy. Bul týraly Aqordada QR Memlekettik hatshysy Gúlshara Ábdiqalyqova Dúnıejúzilik Banktiń Qazaqstandaǵy turaqty ókili Lıýdmıla Býtenkomen kezdesýi aldynda tilshilerge QR Bilim jáne ǵylym mınıstri Aslan Sárinjipov málim etti.
«Dúnıejúzilik Bankpen arada birneshe jobalarymyz bar. Birinshisi, tehnologııalardy kommertsııalandyrýǵa baılanysty. Osy arqyly biz ǵylymı uıymdar men ǵalymdarǵa arnaıy granttardy beretin bolamyz. Bul turǵyda otandyq ǵalymdarymyz naqty ónim men tehnologııalardy ázirlep, naryqqa shyǵarýǵa qaýqarly bolady»,-dedi mınıstr.
A. Sárinjipovtiń sózine qaraǵanda, ekinshi joba kásibı-tehnıkalyq bilim berý júıesin damytýǵa negizdelgen. Sol joba arqyly kolledjderge qarjy men granttar bólinbek. Osy baǵyttaǵy qarjyǵa kolledjder ózderiniń baǵdarlamalaryn jáne zerthanalaryn jetildirip, bilim sapasyn arttyrýǵa múmkindik alady. Bul baǵytta 60-tan astam oqý ornyna kómek berildi.
«Bıyl eki jańa jobany bastaýdy josparlap otyrmyz. Birinshisi, bilim berý júıesin damytýǵa baılanysty osy turǵyda bilim berý salasynyń aqparattyq quraldaryn damytýǵa qatysty aýqymdy komponentterdi qamtıtyn bolady. Osy arqyly biz Qazaqstanda bilim salasyndaǵy aqparattandyrýdy jetildirýge kómek kórsetý úshin sarapshylardy jáne Dúnıjúzilik Banktiń tájirıbesin tartqymyz keledi. Al ekinshisi, jastar saıasatyn damytýǵa arnalǵan. Bunda da DB ınfraqurylymdy jetildirýge, jastar uıymdaryn damytýda bizge qoldaý jasaıdy. Bul joba grant túrinde qarjylandyrylady, ıaǵnı ol zaım emes»,-dedi QR BǴM basshysy.
«Atap aıtqanda, bıyl osy eki jobany daıarlap, Parlamentten ratıfıkatsııadan ótse, jobalardy iske asyrýdy aǵymdaǵy jyly bastaıtyn bolamyz»,-dep túıdi ol.
