Bıyl densaýlyq saqtaý salasyna qatysty 3 zań qabyldanady -mınıstr

NUR-SULTAN. QazAqparat – QR Densaýlyq saqtaý mınıstri Ajar Ǵınııat vedomstvonyń 2022 jyldaǵy negizgi mindetterin atady, dep habarlaıdy QazAqparat tilshisi.

«2022 jyly densaýlyq saqtaý júıesiniń aldynda mynandaı birqatar basym mindetter tur. Olar: QR Bıologııalyq qaýipsizdigi týraly, Medıtsına qyzmetkerleriniń kásiptik jaýapkershiligin saqtandyrý týraly zańdardy qabyldaý, Densaýlyq saqtaýdy damytýdyń 2026 jylǵa deıingi baǵdarlamasyn qabyldaý, Qylmystyq túzetý júıesindegi mekemelerdiń medıtsınalyq qyzmetin Densaýlyq saqtaý mınıstrliginiń qaramaǵyna berý týraly zańdy qabyldaý. Sondaı-aq, «Deni saý ult» árbir azamat úshin sapaly jáne qoljetimdi densaýlyq saqtaý» ulttyq jobasyn iske asyrý mindeti bar», -dedi ol mınıstrliktiń keńeıtilgen alqa otyrysynda.

Sondaı-aq vedomstvo basshysy medıtsınalyq mamandyqtardyń shákirtaqysy 30 paıyz artatynyn málim etti.

«Medtsınalyq saladaǵy stýdentterdiń shákirtaqysy orta eseppen 30 paıyz, granttardyń quny 43 paıyz artty. Asa tapshy mamandyqtar boıynsha granttar sany ósti. Osy jyldan bastap medıtsına, pedıatrııa jáne stomatologııa mamandyqtary boıynsha úzdiksiz ıntegeratsııalanǵan bilim berý júıesi engizilýde», - dedi Ajar Ǵınııat.