Bıyl dárigerlerge ústemaqy tóleýge 42 mlrd teńge jumsalǵan

NUR-SULTAN. QazAqparat – Mindetti áleýmettik medıtsınalyq saqtandyrý júıesi qańtar-naýryz aralyǵynda dárigerlerge ústemeaqy tóleýge qansha qarajat jumsaǵany belgili boldy, dep habarlaıdy QazAqparat tilshisi.

Bul týraly Áleýmettik medıtsınalyq saqtandyrý qorynyń basqarma tóraǵasy Bolat Tókejanov Ortalyq kommýnıkatsııalar qyzmetinde ótken brıfıngide aıtty.

«Premer-Mınıstrdiń orynbasary Eraly Toǵjanov depýtattyq saýalǵa bergen jaýabynda aıtylǵandaı, Densaýlyq saqtaý sýbektileriniń koronavırýspen kúreske tartylǵan qyzmetkerlerine ústemeaqy tóleý úshin kepildendirilgen tegin medıtsınalyq kómek jáne mindetti áleýmettik medıtsınalyq saqtandyrý qarajaty esebinen ondaǵan, tipti júzdegen mlrd teńge jumsalǵan. Qazirgi ýaqytta qordan pandemııamen kúresýge qansha qarajat jumsalyp jatyr», - dep surady BAQ ókilderi.

Bolat Tókejanov MÁMS júıesi ótken jyldyń naýryz aıynan bastap dárigerlerge yntalandyrý tólemderin bóle bastaǵanyn eske saldy.

«Qor óz tarapynan medıtsınalyq qoǵamdastyqtar aldyndaǵy óz mindettemelerin jaýapkershilikpen oryndap, tıisti ústemeaqylardy ýaqtyly tólep keledi. 2020 jyly densaýlyq saqtaý qyzmetkerlerin kótermeleýge shamamen 111 mlrd teńge baǵyttaldy. Elimizde kúrdeli epıdemıologııalyq jaǵdaı saqtalyp otyrǵanyn eskersek, bizdiń áriptesterimizge úlken júkteme túsip jatyr deýge bolady. Qor Densaýlyq saqtaý mınıstrliginiń tapsyrmasy boıynsha ústemaqy tóleý jónindegi jumysty jalǵastyrýda. Koronavırýs ınfektsııasymen kúres aıasynda 2021 jyly qańtarda 50,5 myń medıtsına qyzmetkerine 13,9 mlrd teńge tóledi. Aqpan aıynda 51,7 myń medıtsına qyzmetkerine 13,8 mlrd teńge aýdardy. Naýryzda 53,2 myń medıtsına qyzmetkerline 14,7 mlrd. teńge mólsherinde ústemeaqy esepteldi. Jalpy, aǵymdaǵy jyldyń birinshi toqsanynda 42,4 mlrd teńge tıisti ústemeaqy tóleýge baǵyttaldy», - dedi Bolat Tókejanov.