Bıyl dándi daqyldar egistiginiń 70 paıyzy jaqsy kúıde - Úkimet otyrysy

NUR-SULTAN. QazAqparat – Bıyl dándi daqyldar egistiginiń 70 paıyzy jaqsy kúıde. Bul týraly búgin Úkimet otyrysynda QR Aýyl sharýashylyǵy mınıstri Erbol Qarashókeev aıtty, dep habarlaıdy QazAqparat tilshisi.

«Osy jyldyń qolaıly jaǵdaılary egistikterdiń jaı-kúıine de oń áserin tıgizdi. Máselen, oblystar ákimdikteriniń jedel derekteri boıynsha búgingi kúni dándi daqyldar egistiginiń 70 paıyzy jaqsy, 28,8 paıyzy qanaǵattanarlyq kúıde. Búgingi tańda jappaı egin jınaý jumystaryn bastaýǵa aýyl sharýashylyǵy óndirýshileri barlyq qajetti tehnıkany daıyndap, egisti jınaýǵa kiristi. Jalpy, egin jınaý jumystaryn júrgizý úshin respýblıkada 147,7 myń traktor, 38,1 myń astyq jınaıtyn kombaın, 13,3 myń destelegish, 73,4 myń traktor tirkemesi bar», - dedi mınıstr.

Onyń aıtýynsha, Memleket basshysynyń tapsyrmasyn iske asyrý aıasynda «Jasyl damý» aktsıonerlik qoǵamynyń qarajaty esebinen aýyl sharýashylyǵy tehnıkasyna jeńildikpen kredıt berý pysyqtalǵan. Kredıt berý jumysy bastalyp ketti.

«Jeńildikti lızıngke shamamen 40 mlrd teńge baǵyttaldy. Osy jyldyń 5 tamyzynan bastap «QazAgroQarjy» aktsıonerlik qoǵamynyń barlyq fılıaldarynda osy baǵdarlamaǵa qatysýǵa ótinimder qabyldaý júzege asyrylady. Búgingi kúni 16,9 mln teńge somasyna 306 ótinim qabyldandy. Jumys jalǵasýda», - dedi Erbol Qarashókeev.