Bıyl da shegirtkeden qaýip bar -QR AShM
«Aǵymdaǵy jyly zııandy jáne asa qaýipti zııandy organızmder men karantındik obektilerdiń 5,1 mln gektarǵa, onyń ishinde 1,92 mln gektarǵa úıirli shegirtke tektes zııankesterdiń, 2,4 mln gektarǵa astyq daqyldary aýrýlarynyń, 444 myń gektarǵa saıaq shegirtke tektesterdiń taralýy boljanýda. Ósimdikterdi qorǵaý is-sharalaryn júrgizýge respýblıkalyq bıýdjetten 3,57 mlrd teńge bólindi», - dedi vıtse-mınıstr.
Onyń dereginshe, pestıtsıdterdi satyp alý konkýrstary aıaqtaldy. Úıirli shegirtke tektesterge qarsy 540 dana búrikkish tehnıkalary jumyldyrylady. Ońtústik Qazaqstan jáne Jambyl oblystary boıynsha asa qaýipti zııandy organızmderge qarsy hımııalyq óńdeý boıynsha jetkizýshiler aıqyndaldy, qalǵan óńirler boıynsha konkýrstyq rásimder jalǵasýda.
«Marokkolyq shegirtke Ońtústik Qazaqstan jáne Jambyl oblystarynda jappaı taralýy múmkin. Osy óńirlerde marokkolyq shegirtkege qarsy 640 myń gektardy óńdeý josparlandy. Oblystar ákimdikterine jedel shtabtar qurýdy usynamyz. Saıaq shegirtke tekstesterge basa nazar aýdarý qajet», - dedi ol.
Arman Evnıevtiń aıtýynsha, aǵymdaǵy jyly jergilikti atqarýshy organdar 408 myń gektar jerdi óńdeýge 317 mln teńge bóldi.
«Qoldaǵy aqparatqa sáıkes oblys ákimdikteriniń barlyǵy birdeı bul maqsattarǵa qarajat kózdemegen. Mysaly, Qaraǵandy oblysynyń ákimdigi 15,6 mln. teńge bólgen. Bul 33 myń gektar jerdiń tek 24 paıyzyn óńdeýge múmkindik beredi. Qytaımen, Ózbekstanmen jáne Reseımen shekaralas aýmaqtardan úıirli shegirtke tektesterdiń ushyp kelýiniń ýaqtyly aldyn alý maqsatynda mınıstrlikpen úıirli shegirtke tektestermen kúresý maqsatynda yntymaqtastyq týraly kelisimder jasaldy. RF-men 2018 jylǵa birlesken is-sharalar jospary kelisildi», - dedi ol.