Bıyl Buqtyrma sý qoımasy 10 jyl bolmaǵan rekordty deńgeıge tartylǵan

ASTANA. QazAqparat – Keıingi 7 jylda Buqtyrma sý qoımasynyń kólemi 45-ten 38 tekshe shaqyrymǵa deıin azaıdy. Senator Olga Býlavkına depýtattyq saýalynda sý resýrstaryn basqarý máselelerine toqtaldy, dep habarlaıdy QazAqparat tilshisi.

Depýtattyń aıtýynsha, 2019 jyldan beri Qazaqstanda kaskadty tártipte jumys isteý erekshelikterine baılanysty strategııalyq gıdroelektrstantsııalardy paıdalanatyn sýbektiler áreketteriniń biryńǵaı quqyqtyq algorıtmi bolmaǵan. Ertis ózenindegi sý elektr stantsııalarynda sý tutyný boljamyn jasaýǵa qajet aqparat joq. Osyǵan baılanysty jumysy ekonomıkanyń sabaqtas salalarynyń múddelerin qozǵaıtyn sý elektr stantsııalarynyń jumys isteý erekshelikteri eskerilmeıdi.

O. Býlavkına aıtýynsha, Ertis SES kaskadyn paıdalaný aspektilerin retteıtin normatıvtik-quqyqtyq aktilerdiń bolmaýy sý tasqyny jáne sý tartylǵan kezeńde tereń ekologııalyq zardapqa nemese tótenshe jaǵdaıǵa ákelýi múmkin.

«Bıyl sý jaǵalaýdan 50-70 metrge shegindi, bul 2012 jyldan beri baıqalmaǵan sý deńgeıiniń rekordtyq kórsetkishi», - dedi senator.

Depýtat bul jaǵdaı birneshe sabaqtas salanyń máselesin qozǵaıtynyn eskere otyryp, gıdrotehnıkalyq qurylystardyń qaýipsizdigin retteýdiń quqyqtyq júıesin ázirleýdi, azamattardy taza aýyzsýmen qamtamasyz etýge, agroónerkásip keshenin damytýǵa baǵyttalǵan birqatar baǵdarlamalyq qujattardy iske asyrý boıynsha sheshim jasaýdy usyndy.

Shyǵys Qazaqstan oblysyndaǵy Buqtyrma sý qoımasy jyl saıyn tartylyp otyrǵanyn budan buryn habarlaǵan bolatynbyz.