Bıyl «Bolashaq» stıpendııasyn taǵaıyndaýǵa 1 myń 7 oryn belgilenip otyr
ASTANA. Maýsymnyń 7-si. QazAqparat /Qanat Mámetqazyuly/ - Aǵymdaǵy jyly «Bolashaq» stıpendııasyn taǵaıyndaýǵa 1 myń 7 oryn belgilenip otyr.
Bul týraly búgin 2010 jylǵy Qazaqstan Prezıdentiniń «Bolashaq» halyqaralyq stıpendııasyn taǵaıyndaý máselesine arnalǵan baspasóz máslıhaty barysynda QR Bilim jáne ǵylym mınıstrligi Strategııa departamenti dırektorynyń orynbasary Aqerke Abylaıhan málim etti, dep habarlaıdy QazAqparat.
«Bolashaq» baǵdarlamasy elimiz úshin qıyn kezeńde - 1993 jyly Memleket basshysynyń salıqaly saıasatynyń arqasynda dúnıege kelgen bolatyn. Búgingi kúni júzege asqanyna 17 jyl tolyp otyrǵan bundaı halyqaralyq stıpendııa óz ómirsheńdigin kórsetip otyr. Jalpy, sońǵy jyldarda álemde oryn alǵan qarjy daǵdarysyna qaramastan, bizdiń stıpendıanttarymyz sheteldiń aldyńǵy qatarly JOO-larynda óz oqýlaryn jalǵastyrýda. Olardyń barlyǵynyń oqý qarajattary, shákirtaqylary ýaqytyly tólenýde. Tipti sońǵy kezderi damyǵan elderdiń ózinde bıýdjettik shyǵyndar qysqartylyp jatqanyna qaramastan, qazaqstandyq stıpendıanttar eshqandaı qarjylyq problemany kórip otyrǵan joq», - dedi A. Abylaıhan.
Onyń aıtýynsha, bıyl «Bolashaq» halyqaralyq stıpendııasyn taǵaıyndaýǵa 1 myń 7 oryn bólinip otyr. Bul maqsatta, jalpy «Bolashaq» stýdentterin qarjylandyrý úshin tıisti qarajattar qamtylǵan. Sonymen birge, búgingi kúni respýblıka boıynsha túlekter arasynda ótip jatqan Biryńǵaı ulttyq testileý nátıjesi «Bolashaq» konkýrsyna qatysý úshin esepke alynbaıdy. «Alaıda, orta bilim týraly attestattyń ortasha baly - 4,5 baldan kem bolmaýy tıis. Jalpy konkýrsqa qatysýdyń negizgi talaptary 2008 jylǵy ereje boıynsha qalyp, oǵan eshqandaı da ózgeris engizilmedi», - dedi A. Abylaıhan.
Esterińizge sala keteıik, búgin, maýsymnyń 7-sinen bastap «Bolashaq» halyqaralyq stıpendııasyn taǵaıyndaý úshin qujattardy qabyldaý bastaldy. Qujattardy qabyldaý Astana jáne Almaty qalalarynda júrgiziledi. Іrikteý erejesi, basym mamandyqtar men qajetti qujattar tizbesi, úmitkerlerdiń qosymsha saýalnamalary, sondaı-aq konkýrs boıynsha qosymsha aqparat «Halyqaralyq baǵdarlamalar ortalyǵy» AQ-nyń www. edu-cip.kz resmı saıtynda ornalastyrylǵan.
