Bıyl «Bıznestiń jol kartasy» baǵdarlamasy sheńberinde óńirlerge 30 mlrd. teńge nysanaly transfertter bólý josparlanýda - Q. Toqaev
ASTANA. Naýryzdyń 9-y. QazAqparat /Qanat Mámetqazyuly/ - Aǵymdaǵy jyly kásipkerlikti qoldaý men ındýstrııalyq ınfraqurylymdy damytý úshin «Bıznestiń jol kartasy» baǵdarlamasy sheńberinde óńirlerge 30 mlrd. teńge mólsherinde nysanaly transfertter josparlanýda. Bul týraly búgin QR Parlamenti Senatynda «Óńir» depýtattyq tobynyń otyrysy barysynda Palata Tóraǵasy Qasym-Jomart Toqaev osylaı málim etti,
dep habarlaıdy QazAqparat.
«Jalpy, «Jol kartasyn» júzege asyrý bıliktiń barlyq deńgeılerinen óte sapaly ári tıimdi jumysty talap etedi. Sondyqtan da, jergilikti jerlerde meılinshe tıimdi ári qaýyrt jumystar atqarylýy shart. Jergilikti memlekettik basqarý jáne ózin-ózi basqarý organdary bızneste týyndaǵan barlyq problemalarǵa tereń den qoıyp, qordalanǵan máselelerdi eńserýde jan-jaqty oılastyrylǵan ýaqytyly sheshimder qabýyldaýy tıis. Endigi jerde, óńirler aımaqty damytý jónindegi baǵdarlamalardy pysyqtap, eldiń 2020 jylǵa deıingi damýynyń strategııalyq josparlaryn jáne basqa da baǵdarlamalardy negizgi erejelerimen ushtastyrý kerek. Memlekettik deńgeıdegi aýqymdy mindetterdi oryndaýda óńirlerdiń zor róli men jaýapkershiligin aıqyn sezinýdiń mańyzy joǵary. Sondyqtan da «Óńir» depýtattyq tobynyń negizgi qyzmeti burynǵydaı óńirlerdi damytý men jergilikti ózin-ózi basqarýdaǵy, jańa óńirlik saıasattaǵy memlekettik saıasatty túsindirýge jáne nasıhattaýǵa baǵyttalýy tıis», dedi Q. Toqaev.
