Bıyl birinshi toqsanda bıýdjet kirisi 3 trln teńgege jýyqtady

NUR-SULTAN. QazAqparat - 2019 jylǵy birinshi toqsannyń qorytyndysy boıynsha memlekettik bıýdjet kirisi 2,9 trln teńgege jetip, bir jylda 10,3 paıyzǵa artty. Bul týraly Finprom.kz sarapshylary málim etti, dep habarlaıdy QazAqparat.

Aıta keteıik, 2018 jyldyń osy kezeńinde membıýdjettiń tabysy 2,7 trln teńgeni qurady.

«Memlekettik bıýdjet kiristeri qurylymynda onyń negizgi úlesin salyq túsimderi qamtyp, 70,6 paıyz boldy. Bir jyl buryn salyqtyń úlesi 67,3 paıyz deńgeıinde qalyptasqan edi. Ekinshi oryn transfertter túsimine tıesili, ıaǵnı 790 mlrd teńge nemese kiristerdiń jalpy somasynan 27 paıyzy. Bul baǵytta bir jyl ishinde 0,6 paıyz kóleminde birshama tómendeý baıqaldy. Salyqtyq emes kirister jáne negizgi kapıtaldy satýdan bolǵan tabystar sáıkesinshe 46,5 mlrd jáne 23,7 mlrd teńgeni qurady. Olardyń jıyntyq úlesi 2,4 paıyz boldy», - dedi sarapshylar.

Bıylǵy úsh aıda memlekettik bıýdjetke salyqtyq túsimder 2,1 trln teńgeni qurap, ótken jylǵy tıisti kezeńnen (1,8 trln teńge) 15,7 paıyzǵa artyq boldy.

Esterińizge sala keteıik, bıyl sáýir aıynda Qazaqstan Prezıdenti Qasym-Jomart Toqaev Premer-Mınıstrdiń birinshi orynbasary - Qarjy mınıstri Álıhan Smaıylovty qabyldady.

Qasym-Jomart Toqaev bıýdjettik shyǵyndardy ońtaılandyrý jáne memlekettik bıýdjetke túsimdi kóbeıtý qajettigin aıtty. Sondaı-aq, Prezıdent kedendik jáne salyqtyq ákimshiliktiń tıimdiligin arttyrýdy tapsyrdy.