Bıyl «Bir el - bir kitap» aktsııasy aıasynda kópshilikke J.Aımaýytovtyń «Aqbilek» romanyn oqý usynylyp otyr

J.Aımaýytovtyń «Aqbilek» romanyn kópshilikke oqýǵa usyný sheshimi Qazaqstannyń halyq jazýshysy, Memlekettik syılyqtyń laýreaty Farıza Ońǵarsynovanyń tóraǵalyǵymen ótken «Bir el - bir kitap» aktsııasy uıymdastyrý komıtetiniń otyrysynda qabyldandy.

«Aqbilek» romany - bir ǵana qazaq qyzynyń kúrdeli taǵdyry negizinde áleýmettik tóńkerister tusyndaǵy qazaq aýylynyń ózgerý protsesin sýrettegen alǵashqy qazaq romandarynyń biri. Shyǵarmanyń bas keıipkeri Aqbilek óshikken adamdardyń kesirinen aq áskerlerdiń tutqynyna túsip, neshe qıly qorlyq kóredi. Óz elinde de alýan qıyndyqtarǵa jolyǵady. Keıin tóńkeris aıaqtalǵan soń qalaǵa ketip, oqý oqyp, óz baqytyn tabady.

Aqbilektiń basynan ótetin osy oqıǵalar arqyly jazýshy sol bir qıyn-qystaý kezeńdegi qazaq aýyldaryndaǵy ómir shyndyǵyn, adamdardyń túrli taǵdyryn keńinen beıneleıdi.

Aktsııany uıymdastyrýshylar romandy el arasynda nasıhattaýǵa arnalǵan is-sharalar josparyn ázirledi. Onyń aıasynda Qazaqstannyń barlyq memlekettik kitaphanalarynda romannyń máni men mazmunyn ashatyn kezdesýler, dóńgelek ústelder otyrystary, oqý marafondary men kórmeler, barlyǵy myńnan astam shara uıymdastyrylady. Kitap súıer qaýym «Aqbilek» romanynyń elektrondyq kóshirmesin www.kazneb.kz saıtynan ala alady.

Eske salaıyq, QR Mádenıet mınıstrligi men QR Ulttyq akademııalyq kitaphananyń birlesken jobasy bıyl besinshi ret ótkizilip otyr. Aktsııanyń maqsaty - jazba mádenı muramyzdy nasıhattaý jáne qoǵamda kitap oqýǵa degen qyzyǵýshylyqty arttyrý.