Bıyl «Bıologııalyq qaýipsizdik týraly» zań ázirlenedi

NUR-SULTAN. QazAqparat – Bıyl «Bıologııalyq qaýipsizdik týraly» zań ázirleýimiz kerek. Bul týraly búgin QR Densaýlyq saqtaý mınıstrliginiń keńeıtilgen alqa otyrysynda vedomstvo basshysy Alekseı Tsoı aıtty, dep habarlaıdy QazAqparat tilshisi.

«Tótenshe jaǵdaı kezinde zamanaýı qorǵanys quraldaryn engizý jáne olardyń terrorızmge qarsy turaqtylyǵyn arttyrý arqyly bıologııalyq qorǵaıtyn júıelerdi jetildirý qajet boldy. Osyǵan baılanysty 2021 jyly «Bıologııalyq qaýipsizdik týraly» zań ázirleýimiz kerek», - dedi Densaýlyq saqtaý mınıstri.

Onyń aıtýynsha, atalǵan zańdy júzege asyrý aıasynda baqylaý júıesin jetildirý úshin 38 normatıvtik-quqyqtyq aktige halyqtyń densaýlyq jaı-kúıin baǵalaý, saraptama jasaý jáne boljaý júıelerin damytý, syn-tegeýirinderge qarsy áreket etý bóliginde túzetýler engiziledi.

«Elimizdiń medıtsınalyq joǵary oqý oryndarynda sanıtarlyq-gıgıenalyq beıindegi fakýltetter qaıta qalypyna keltirildi. Sanıtarlyq-epıdemıologııalyq qyzmettiń kadrlyq áleýetin arttyrý úshin qaıta daıyndaý jáne biliktilik arttyrý júıesi jetńildiriledi. Qyzmetti tsıfrlandyrý 2025 jyly aıaqtalady»,- dedi Alekseı Tsoı.

Mınıstrdiń sózine qaraǵanda, 2022-2024 jyldary aralyǵynda sanıtarlyq-epıdemıologııalyq qyzmettiń ınfraqurylymyn jańǵyrtý úshin komıtettiń aýdandyq bólimsheleriniń 54 ǵımaraty jóndeledi. Ulttyq saraptama ortalyǵynyń 27 ǵımaratyna jóndeý júrgizilip, 3 zerthananyń jańa ǵımaraty salynady. Komıtettiń aýmaqtyq bólimsheleri úshin 64 avtokólik satyp alynady.