Bıyl bilim granty 34 315 adamǵa beriledi
ASTANA. 6 tamyz. QazAqparat - 2012-2013 jylǵa arnalǵan joǵary bilimdi mamandardy daıarlaýǵa memlekettik bilim berý tapsyrysynyń jalpy kólemi 34 315 bilim berý grantyn quraıdy.
Bul týraly búgin QR Bilim jáne ǵylym mınıstri Baqytjan Jumaǵulovtyń tóraǵalyǵymen ótken bilim berý granttaryn taǵaıyndaý jónindegi respýblıkalyq komıssııa jumysynyń barysynda málim boldy.
Sondaı-aq, konkýrstyq negizde memlekettik bilim berý tapsyrysy ornalastyrylatyn joǵary oqý oryndarynyń tizimi de anyqtaldy. Bilim berý grantyn ornalastyrý quqyǵyna 80 joǵary oqý orny ıe bolǵan. Mınıstrlik málimetinshe, bilim berý grantyn taǵaıyndaý konkýrsyna 67 985 talapker qatysýda, olardyń 48 350 talapkeri - qazaq tilindegi oqý bólimine, 19 635 talapkeri - orys tilindegi oqý bólimine tapsyrǵan. Toqtala ketetin jaıt, 2011 jyly 91 018 talapker qatysyp, olardyń 66 912 talapkeri - qazaq tilindegi oqý bólimine, 24106 talapkeri - orys tilindegi oqý bólimine úmitker bolǵan edi.
«Konkýrsqa qatysýshylardyń arasynda 54 612 talapker - UBT-nyń, 12 110 talapker - keshendi testileýdiń, 948 talapker - halyqaralyq olımpıadalardyń, 315 talapker - Nazarbaev zııatkerlik mektebiniń sertıfıkatymen enip otyr. Al 2011 jylmen salystyrǵanda, byltyr UBT qatysqandar - 80 353 talapker, keshendi testileý - 9 872, halyqaralyq olımpıadalar - 793 adamdy quraǵan bolatyn»,-dep atap ótti Bilim jáne ǵylym mınıstri.
