Bıyl bilim berý grantyn taǵaıyndaý konkýrsyna 68 myńnan astam adam qatysty
ASTANA. 26 tamyz. QazAqparat - 2013-2014 oqý jylyndaǵy joǵary bilimi bar kadrlardy daıarlaýǵa arnalǵan memlekettik bilim berý tapsyrysy 35 053 grantty quraıdy, onyń ishinde 3 000 grant kolledj bitirýshileri úshin jáne 2 480 grant daıyndyq bólimderine berildi.
Bul týraly QR Bilim jáne ǵylym mınıstrliginiń taratqan málimetterinde keltirilgen.
«Bilim berý grantyn taǵaıyndaý konkýrsyna 68 742 adam qatysty. Respýblıkalyq konkýrstyq komıssııa tamyzdyń 2-9 aralyǵynda jumys jasady. Konkýrstyń nátıjesi boıynsha 32 393 bilim berý granty taǵaıyndaldy. Qazirgi ýaqytta, joǵary oqý oryndary grant ıegerleriniń, sondaı-aq aqyly negizde oqýǵa nıet bildirgenderdiń qujattaryn qabyldaýda», - delingen vedomstvo habarlamasynda.
Aǵymdaǵy jyldyń qyrkúıek aıynda memlekettik tapsyrys boıynsha qalǵan 2 480 oryn joǵary oqý oryndarynyń daıyndyq bólimderinde oqý úshin qazaq dıasporalarynyń ókilderine jáne shetel azamattaryna taǵaıyndalady.
«Magıstratýra men doktorantýraǵa 6 959 jáne 520 oryn sáıkesinshe bólindi. Tamyzdyń 10-y men 14-i aralyǵynda shetel tili boıynsha testileý júrgizildi. Testileýde barlyǵy 30 865 adam qatysty, onyn ishinde 22 189-y (75%) sátti tapsyrdy. Kazirgi tańda mamandyq boıynsha emtıhandar júrgizilýde», - dep atap ótilgen taratylǵan málimette.
