Bıyl bilim berý granttaryna 1 orynǵa 2,1 adam talasýda - Bilim mınıstrligi
ASTANA. 6 tamyz. QazAqparat - Ótinish qabyldaý nátıjeleri boıynsha ortasha alǵanda bir orynǵa konkýrs 2,1 adamdy quraıdy.
Bul týraly búgin QR Bilim jáne ǵylym mınıstri Baqytjan Jumaǵulovtyń tóraǵalyǵymen ótken bilim berý granttaryn taǵaıyndaý jónindegi respýblıkalyq komıssııanyń jumysy barysynda málim boldy.
Mınıstrlik málimetine súıensek, konkýrsqa 1 305 «Altyn belgi» belgisiniń ıegerleri, 315 Nazarbaev zııatkerlik mektepteriniń túlekteri, 279 jalpy bilim beretin pánder boıynsha halyqaralyq jáne respýblıkalyq olımpıadalardyń jeńimpazdary, 578 jalpy bilim beretin pánder boıynsha halyqaralyq jáne respýblıkalyq ǵylymı jarystardyń jeńimpazdary, 695 respýblıkalyq jáne halyqaralyq sporttyq jarystardyń jeńimpazdary, 470 jetim balalar, 320 múgedekter qatysady.
«Ótinish qabyldaý nátıjeleri boıynsha ortasha alǵanda bir orynǵa konkýrs 2,1 adamdy quraıdy. Eń kóp konkýrs Bıotehnologııa, Radıotehnıka, Elektronıka jáne telekommýnıkatsııalar, Standarttaý, sertıfıkattaý jáne metrologııa, Aqparattyq júıeler, Avtomattandyrý jáne basqarý, Aýdarma isi, Halyqaralyq qatynastar, Dızaın, Quqyqtaný, Qarjy, Esep jáne aýdıt, Ekonomıka, Halyqaralyq quqyq mamandyqtary boıynsha baıqalady»,-deıdi mınıstr.
Konkýrstyq komıssııa jalpy 31 210 bilim berý grantyn, kúndizgi oqytý nysany boıynsha 30 710 bilim berý granttaryn, syrttaı oqytý nysany boıynsha 500 grant taǵaıyndaıdy. Komıssııanyń jumysy aıaqtalǵannan keıin bilim berý granttaryn taǵaıyndaý nátıjesi respýblıkalyq baspasóz quraldarynda jarııalanady.
