Bıyl bes aıda Qazaqstanda 391 myń avtokólik tirkeýge qoıyldy
NUR-SULTAN. QazAqparat – 2020 jylǵy bes aıda Qazaqstanda 391 myń avtokólik tirkeýge qoıyldy. Bul týraly «QazAvtoÓnerkásip» avtokólik salasyndaǵy kásiporyndar odaǵy málim etti, dep habarlaıdy QazAqparat.
«Esepti kezeńde ákimshilik polıtsııa organdary 391 801 avtokólikti tirkeýge qoıdy. Atalǵan kórsetkish ótken jyldyń sáıkes kezeńinen 32,1 paıyzǵa kem. Onyń ishinde 358 146-sy ekinshi ret tirkelgender úlesinde, ıaǵnı bir adamnan ekinshi adamnyń atyna aýystyrylǵan kólikter sanatyna jatqyzyldy. Bir jyl burynǵy deńgeımen salystyrǵanda 33,7 paıyzǵa tómendedi. Al alǵash ret tirkelgen kólik quraldarynyń sany 33 655-ti qurady. Ol byltyrǵa qaraǵanda, 7,9 paıyzǵa az», - dep atap kórsetilgen taratylǵan málimette.
Bıylǵy qańtar-mamyrda Qazaqstan aýmaǵynda 16 elektromobıl tirkelgen eken.
«QazAvtoÓnerkásiptiń» habarlaýynsha, esepti kezeńde qaıta tirkelgen kólikterdiń úshten ekisinen astamyn (68,2 paıyzy) paıdalaný merzimi 10 jyldan asqan kólikter qamtyǵan.
Atap aıtqanda, 20 jyldan asqandardyń úlesi 151 440 myń kólik (42,3 paıyz) bolsa, 11-den 20 jylǵa deıingiler 25,9 paıyzdy (92 883 kólik) qurady. Al 4-ten 7 jylǵa deıingiler – 61 259 kólikke (17,1 paıyz), 8-den 10 jylǵa deıingiler – 35 213 kólikke (9,8 paıyz), 1-den 3 jylǵa deıingi kólik sany 16 620-ǵa jetti. Sonymen qatar, paıdalaný merzimi 1 jylǵa jetpegen kólikterdiń úlesi 0,2 paıyz (731avtomobıl) boldy.
