Bıyl benzın, dızeldi otyn tolyǵymen elimizde óndiriledi - Bozymbaev

ASTANA. QazAqparat - QR Energetıka mınıstri Qanat Bozymbaev aǵymdaǵy jyly ishki naryqty 100 protsenke otandyq munaı ónimderimen toltyrýǵa ýáde etti, dep habarlaıdy QazAqparat tilshisi.

Onyń aıtýynsha, ótken jyldyń qorytyndysy boıynsha ishki naryqty otandyq benzınmen qamtamasyz etý deńgeıi 93,2 protsentti qurady. Dızeldi otyn - 91,5 protsent, al ózimizde shyǵarylatyn áýe kerosıni 62 protsentke jetti. «Bıyl bınzın, dızeldi otyn men áýe kerosıni 100 protsentke ózimizde shyǵarylady. Endi, qysqy dızeldi otyn boıynsha birshama aýytqýlar bolady. Sebebi qatty aıazdarda atalǵan ónim Reseı Federatsııasynan jetkiziledi. Al benzınniń kólemi artyǵymen óndiriledi degen boljam bar. Jalpy, bıyl 12,2 mıllıon tonna munaı ónimderin shyǵarýdy josparlap otyrmyz. Ol ótken jylmen salystyrǵanda 5 protsentke artyq», - dedi Q.Bozymbaev qoǵamdyq keńestiń otyrysynda.

Aıta keteıik, búgingi otyrysta mınıstr otandyq benzındi kórshi memleketterge eksporttaýdy bastaıtynyn aıtty. «Bıyl biz ózimizdiń munaı ónimderin kórshilerge tasymaldaýdy bastaımyz. Búgin Almatyda qyrǵyz áriptesterimizben aradaǵy kelissóz aıaqtalady. Kelesi aptada Senatta Qazaqstan men Reseı arasyndaǵy kelisimdi ratıfıkatsııalaý máselesi qaralady. Buǵan deıingi qujatta óz elimizden munaı ónimderin eksporttaýǵa tyıym salynǵan bolatyn. Al jańa kelisim ol shekteýdi alyp tastap, ekportymyzǵa jol ashatyn bolady. Sondyqtan, shamamen naýryz aıynda, osy toqsannyń aıaq jaǵyna qaraı biz eksportty bastaıtyn shyǵarmyz», - dep atap kórsetti Q.Bozymbaev.