Bıyl Beket atanyń týǵanyna 270 jyl tolady

AQTAÝ. QazAqparat – Bıyl Beket atanyń 270 jyldyq mereıtoıy atap ótiledi. Tarıhı oryndy kógaldandyrý jumystary júrgizilip, 200 kóshet otyrǵyzylmaq, dep habarlaıdy QazAqparat tilshisi.

Beket Myrzaǵululy 1750-1813 jyldar aralyǵynda ómir súrgen. Jastaıynan syrt jaýǵa qarsy soǵysta erlik tanytqan ol sondaı-aq batyr, sáýletshi, aǵartýshy, áýlıe kisi retinde tanylǵan.

Áýlıe týraly ańyz-áńgimeler men tylsym oqıǵalar kóp. Solardyń birinde Bekettiń 13 jasynda bilim qýyp Hıýaǵa baryp, Sherǵazy medresesinde Paqyrjan qajy degen belgili ustazdan 7 jyl dáris alyp, keıin elge oralǵany, ıslamdy ýaǵyzdap, shákirt tárbıelegeni jaıynda aıtylady.

Sondaı-aq, qazirgi kúni pir Beket saldy degen birneshe meshit belgili. Paıǵambar jasynda ómirden ótken áýlıe ózi salǵan Oǵlandydaǵy meshitke jerlengen.

Bul meshit saıda ornalasqandyqtan, oǵan kólik jete almaıdy. Sondyqtan zııarat etýshilerge jalǵyz aıaq jolmen eki shaqyrymdaı jerdi jaıaý júrip ótýge týra keledi.

Jolaı jalǵyz qalyp, oılanyp, tabıǵattyń ásem kórinisterine súısiný múmkindigi de joq emes. Munda arqarlar kóptep kezdesedi deıdi jergilikti jurt.