Bıyl «Báıterek» zeınetaqy qorynan 500 mlrd teńge qaryz alady
«Aktıvterdiń aıtarlyqtaı kólemine qatysty teńgerimdi ınvestıtsııalyq saıasatty júrgizý – portfeldi ártaraptandyrýdy talap etedi, ony tek jergilikti baǵaly qaǵazdar naryǵy aıasynda júzege asyrý múmkin emes.
2016-2019 jyldar aralyǵynda BJZQ zeınetaqy aktıvteriniń valıýtalyq úlesi kezeń-kezeńimen 17%-dan 33%-ǵa deıin ulǵaıtyldy. Bul rette BJZQ zeınetaqy aktıvteriniń valıýtalyq bóligin tıimdi basqarý maqsatynda shetel aktıvteriniń negizgi klastaryna ınvestıtsııalaýdy kózdeıtin strategııalyq bólý ázirlendi. Bul – álemdik aktsııalar, damyǵan jáne damýshy elderdiń oblıgatsııalary, ınvestıtsııalyq deńgeıdegi emıtentterdiń korporatıvtik oblıgatsııalary», - dedi spıker.
Onyń málimetinshe, 2022 jyldyń qorytyndysy boıynsha, zeınetaqy aktıvteriniń ósýi jaǵdaıynda, onyń ishinde ınvestıtsııalyq kiris esebinen BJZQ portfelindegi valıýtalyq aktıvterdiń úlesi tómendep, 28,4%-dy kórsetti. Zeınetaqy aktıvteriniń odan ári kútiletin ósimin eskere otyryp, BJZQ portfelindegi valıýtalyq úles 2023 jyldyń sońyna qaraı 24,3%-ǵa deıin tómendeýi múmkin.
«Zeınetaqy aktıvterindegi valıýtalyq úlestiń kútiletin tómendeýin eskere otyryp, Ulttyq bank 2023 jylǵa deıin shetel valıýtasyn kezeń-kezeńimen satyp alýdy josparlap otyr. Valıýta pozıtsııasyn 30% deńgeıde ustap turý úshin shamamen 2 mlrd AQSh dollaryn satyp alý qajet bolady. Osynsha mólsherdegi aqshany satyp alý valıýta naryǵyna aıtarlyqtaı áser etpeıdi, óıtkeni ol ortasha tarıhı mánderdiń 6-7 paıyzynan aspaıdy (KASE-degi jyldyq saýda kólemi 2022 jyldyń aıaǵynda 29,7 mlrd boldy). Sonymen qatar, shetel valıýtasyn satyp alý boıynsha bul operatsııalar Qazaqstan qor bırjasynyń alańynda jyl boıy birkelki qalypta júzege asyrylady», - dedi Ulttyq bank ókili.
Bul operatsııalar týraly málimetti Ulttyq Banktiń saıtynda aı saıyn ornalastyrylatyn valıýta naryǵy týraly aqparattyq habarlamadan bilýge bolady. Sondaı-aq zeınetaqy aktıvterin ınvestıtsııalyq basqarý boıynsha aqparat BJZQ-nyń resmı saıtynda turaqty túrde jarııalanady.
BJZQ portfelindegi shetel valıýtasyn satyp alý zeınetaqy aktıvteri esebinen satyp alynatyn ınvestıtsııalardyń geografııasy men qarjy quraldarynyń aýqymyn keńeıtýge baǵyttalǵanyn atap ótken durys. Bul ınvestıtsııalyq portfeldiń sapasyn jaqsartýǵa, ony ártaraptandyrýǵa, sondaı-aq uzaq merzimdi perspektıvada onyń ótimdiligi men tabystylyǵyn arttyrýǵa múmkindik beredi.
Nurjan Tursynhanov 2023 jyly «Báıterek» UBH» AQ oblıgatsııalaryn satyp alý týraly da atap ótti.
«2023 jyl ishinde «Báıterek» UBH» AQ-nyń uzaq merzimdi oblıgatsııalaryna BJZQ-nyń jalpy somasy 500 mlrd teńgege deıingi zeınetaqy aktıvterin naryqtyq jaǵdaılarda ınvestıtsııalaý josparlanyp otyr. Tartylǵan qarajat mashına jasaý, metallýrgııa, tamaq jáne jeńil ónerkásip, qurylys ındýstrııasy, ınfraqurylym jáne basqa da salalardaǵy iri jobalarǵa kredıt berýge jumsalady. Qarjylandyrylatyn jobalardy irikteý jáne bólingen qarajattyń ıgerilýin baqylaý Qazaqstan Respýblıkasynyń Úkimeti deńgeıinde júzege asyrylady.
Kredıt táýekelderi turǵysynan «Báıterek» UBH» AQ-ǵa ınvestıtsııa salý qaýipsiz ári bul is júzinde Qazaqstan Respýblıkasy Úkimetiniń baqylaýynda bolady. Holdıngtiń kredıttik reıtıngi Qazaqstannyń táýelsiz kredıt reıtıngi deńgeıinde jáne Fitch Ratings agenttiginiń halyqaralyq shkalasy boıynsha turaqty boljammen «VVV» quraıdy», - dep atap ótti departament basshysy.
BJZQ zeınetaqy aktıvterin ınvestıtsııalaý naryqtyq jaǵdaılarda uzaq merzimdi ınvestıtsııalyq kókjıekti eskere otyryp, júzege asyrylady. Osylaısha, joǵaryda atalǵan ınvestıtsııalar senimdi bolyp tabylady jáne jyl saıyn BJZQ salymshylaryna ınvestıtsııalyq tabys ákeledi.
Foto: nationalbank.kz
