Bıyl baılanys sapasyna qatysty 5 myńǵa jýyq aryz-shaǵym túsken

ASTANA. QazAqparat – Jyl basynan beri baılanys jáne onyń sapasyna qatysty 5 myńǵa jýyq aryz-shaǵym túsken. Bul týraly Úkimet basshysy Álıhan Smaıylov málim etti, dep habarlaıdy QazAqparat tilshisi.

«Qoljetimdi ınternet» ulttyq jobasy Memleket basshysynyń tapsyrmasy boıynsha ázirlendi. Ol eldi mekenderdegi ınternet sapasy men onyń qoljetimdi bolýyn qamtamasyz etýge baǵyttalǵan. Ókinishke qaraı, bul salada júıeli jumysty kóre almaı otyrmyz. Bıyl jyl basynan beri Úkimetke baılanys jáne aqparattandyrý máselesi boıynsha azamattardan 5 myńǵa jýyq ótinish pen shaǵym kelip tústi», - dedi Álıhan Smaıylov Úkimet otyrysynda.

Premer-Mınıstrdiń aıtýynsha, aryz-shaǵymnyń deni ınternetjyldamdyǵy men sapasyna qatysty.

«Sonymen qatar, eldi mekenderde, tipti iri qalalardyń ózinde mobıldi ınternet joq nemese sapasy nashar. Mundaı shaǵymdar, ásirese Almaty men Astanada kóp. Talshyqty-optıkalyq baılanys jelilerimen 3 myńǵa jýyq aýyl qamtylýy tıis. 2027 jylǵa qaraı respýblıkalyq mańyzy bar qalalardyń 75% jáne oblys ortalyqtarynyń 60% 5G tehnologııasymen qamtamasyz etiledi. Bul rette, qala ishinde uıaly baılanys jabdyqtaryn ornalastyrý qajettigi týraly halyqqa aqparattyq-túsindirý jumystaryn júrgizý mańyzdy. Ol eń aldymen, baılanys sapasyn jaqsartý jáne turǵyndar arasynda radıofobııany azaıtý úshin kerek. Sondaı-aq, derekterdi berý deńgeıi sekýndyna 4-6 terabıtke deıin bolatyn jelilerdiń tranzıttik múmkindikterin ulǵaıtýǵa basymdyq berý qajet», - deıdi ol.

Sondaı-aq, Álıhan Smaıylov Memleket basshysynyń tapsyrmasy boıynsha elimizde tsıfrlyq hab bolýy tıis.

Bul maqsatta ulttyq jobanyń osy maqsattaryna bıýdjetten 5 jyl ishinde shamamen 560 mlrd teńge bólý josparlanǵan.