Bıyl Batys Qazaqstanda ekinshi úshem dúnıege keldi

ORAL. QazAqparat – Batys Qazaqstan oblysynda ómirge kelgen úshem búgin aýrýhanadan úıge shyǵaryldy, dep habarlaıdy QazAqparat tilshisi.

BQO densaýlyq saqtaý basqarmasynyń baspasóz qyzmetinen málim etkenindeı, úshemniń anasy Shynar Sısenǵalıeva Aqjaıyq aýdany ortalyǵy Chapaev aýylynda turady.

Shynar Aqjaıyq aýdandyq aýrýhanasynan sanavıatsııamen Oral qalasyndaǵy oblystyq perınataldyq ortalyqqa jetkizilgen. Sodan 1 shilde kúni úshem dúnıege keldi. Salmaǵy sáıkesinshe 1390, 1310 jáne 830 gramm. Olardyń ekeýi – ul, bireýi – qyz bala. Úshemge Ernaz, Aınaz jáne Almaz degen esim berildi.

Úshemniń ákesi Mahambet Sısenǵalıev – polıtsııa qyzmetkeri. Erli-zaıypty jastardyń budan basqa tórt balasy bar. Úlken qyzy 12-de, uly 9-da. Odan keıingi egiz uly 5-te.

Osylaısha, 33 jastaǵy Shynar Sısenǵalıeva jeti balanyń anasy atanyp otyr.

Dáriger Gúljanat Kóbenqulovanyń aıtýynsha, úshem bastapqyda jansaqtaý bóliminde jatty. Sosyn salmaq qosý úshin eki aı boıy dárigerlerdiń baqylaýynda boldy. Qazir sábıler men olardyń anasynyń densaýlyǵy qalypty. Árıne, budan keıin de kútim kerek.

Bul – bıyl Batys Qazaqstan oblysynda dúnıege kelgen ekinshi úshem.

Eske sala keteıik, budan buryn Batys Qazaqstanda úshem dúnıege kelgenin jazǵan bolatynbyz.