Bıyl «Batys Eýropa - Batys Qytaı» jolynyń 700 shaqyrymy paıdalanýǵa beriledi
Jobany iske asyrý Qazaqstanǵa eýrazııalyq qurlyqtaǵy halyqaralyq jáne tranzıttik toraptardyń biri atanýǵa múmkindik beredi, dep habarlady pm.kz saıty.
Kólik jáne kommýnıkatsııalar mınıstrliginiń aqparaty boıynsha, qazirgi ýaqytta joldyń 1621 shaqyrymynda (34 ýchaske) jumystar júrgizilýde. Qurylys úrdisine 21 bas merdiger jáne 66 sýbmerdiger uıym jumyldyrylyp otyr. Bıyl jyldyń qorytyndysy boıynsha joldyń 700 shaqyrymyn paıdalanýǵa berý josparlanýda.
Oǵan qosa, jyldyń sońyna deıin taǵy 448 shaqyrym ýchaskede jumystardy bastaý josparlanyp otyr( «Shymkent-Jambyl oblysynyń shekarasy - 79 shaqyrym, «Almaty-Qorǵas» - 304 shaqyrym jáne «Taraz qalasyn aınalyp ótetin jol» - 65 shaqyrym).
«Batys Qytaı - Batys Eýropa» magıstrali qurylysynyń áleýmettik mańyzy zor ekenin aıtý kerek. Bul halyqaralyq dáliz shaǵyn jáne orta bıznesti, servıstik ındýstrııa men týrızmdi, ónerkásiptik jáne aýyl sharýashylyǵy qyzmetterin damytýǵa jaǵdaı jasaıdy, al bul óz kezeginde qosymsha jumys oryndaryn qamtamasyz etedi.
Qazirdiń ózinde joldyń qurylysynda 35 myńnan astam adam jumys isteýde. Olardyń ishinde 34,4 myń jumysshy - qazaqstandyqtar bolsa, 579-y - sheteldik jumysshylar.
Kólik jáne kommýnıkatsııa mınıstrliginiń aqparaty boıynsha, Batys Eýropa - Batys Qytaı avtodáliziniń Qazaqstan aýmaǵyndaǵy uzaqtyǵy 2787 km qurap, bes oblystyń aýmaǵymen ótedi. 2452 shaqyrym jol qaıta jóndeýge jatady. Jobanyń jalpy quny 825 mlrd. teńgeni quraıdy. Joba boıynsha 1391 shaqyrym joldy 4 jolaqty І tehnıkalyq sanatqa, 1061 shaqyrym joldy ІІ tehnıkalyq sanatqa aýystyrý kózdelgen.
«Batys Eýropa - Batys Qytaı» halyqaralyq dáliziniń qurylysy Qazaqstannyń tranzıttik jáne eksporttyq áleýetin arttyryp qana qoımaı, eýrazııalyq qurlyqtaǵy belsendi yqpaldastyq jaǵdaıynda jańa saýda-sattyq múmkindikterin ashady.
