Bıyl Bas prokýratýra kásipkerlerge qatysty zańsyz taǵaıyndalǵan 1 880 tekserýdiń jolyn kesti
ASTANA. 23 qarasha. QazAqparat /Rýslan Ǵabbasov/ - Bıyl Bas prokýratýra kásipkerlerge qatysty zańsyz taǵaıyndalǵan 1 880 tekserýdiń jolyn kesti. Bul týraly búgin Astanada ótken brıfıngte Bas prokýratýranyń resmı ókili Jandos Ómirálıev aıtty.
Bul zańsyz tekserýlerdiń taǵaıyndalýyna tyıym salý Shyǵys Qazaqstan (205), Soltústik Qazaqstan (183), Batys Qazaqstan (158), Qostanaı (158) oblystarynda jáne Almaty (169) men Astana (155) qalalarynda oryn alǵan.
«Al tekserý taǵaıyndaǵan organdarǵa kelsek, zańsyz tekserýlerdi tirkeýden bas tartýǵa baılanysty sharalar sanıtarlyq-epıdemıologııalyq qadaǵalaý organdaryna - 676 márte, Aýyl sharýashylyǵy mınıstrligine jáne onyń qurylymdyq bólimderine -253, Tótenshe jaǵdaılar mınıstrligi men onyń qurylymdaryna 188, salyq qyzmetterine -282 jáne ishki ister organdaryna -159 márte qoldanylǵan»,- dedi J. Ómirálıev.
«Keıbir jaǵdaılarda, baqylaýshy organdardyń jekelegen laýazymdy tulǵalary kásipkerlerge qatysty tekserýdi eshqandaı tirkeýsiz, ıaǵnı zańmen belgilengen tirkeý tártibin buza otyryp júrgizgen faktileri anyqtaldy. Mundaı zań buzýshylyqtardyń 1990 faktisi belgili boldy. Olardyń kópshiligi sanıtarlyq-epıdemıologııalyq qadaǵalaý (637), aýyl sharýashylyǵy (593), tótenshe jaǵdaılar (357) , ákimshilikter (271) jáne ishki ister organdarynynda (227) anyqtaldy»,-dedi resmı ókil.
Bas prokýratýranyń Komıteti kásipkerlerdiń quqyqtarynyń buzylý faktileri boıynsha 200 usynys engizdi, sondaı-aq osynyń nátıjesinde 290 laýazymdy tulǵa tártiptik jaýapkershilikke tartyldy.
